لا تتزوج «حنجورية»

«افقديه رجولته».. هكذا ردت تلك «الحنجورية» على سؤال لزوجة بشأن ماذا تفعل مع زوجها الذي «يواعد أخرى» على موقع التواصل الاجتماعى..
هكذا بمنتهى البساطة والإجرام أوعزت إلى الزوجة أن تحاول أن تفقد زوجها «رجولته»، لمجرد أنه يواعد أخرى، عقب رفضها أن تضع له السم فى الأكل، لأنها تريد أن تراه يتعذب أمامها ويعيش كأسير ذليل لا يرفع عينيه أمامها.
العقاب السابق ليس جديداً على الحنجوريات، فغالبيتهن مريضات بداء «المازوخية»، فبالرغم من أنها تقدم نفسها باعتبارها سادية قوية متسلطة لكنها تخفى داخلها «أطنان من المازوخية» وتستمع كثيراً بمن يكسرها – خلف الأبواب المغلقة.
وبشكل عام يمكنك أن تعرف «المازوخيات» من بنات «الحنجوريات» من دلالات عدة:
1 - غالبية الحنجوريات لديهن عقدة «القهر الذكورى» و-الباذنجان ده- وعليه هاتطلع عقدها كلها على سيادتك ومهما تريحها بنسبة 99 % هاتفضل تشكى من 1 % اللى ناقص.
2 - المازوخية دائما تشعر أن هناك «حاجة ناقصة» والحاجة ديه بتخليها مش بعقلها «متلهوجة» ومش مركزة وتحس إنها معاك ومش معاك يعنى تبقى بتكلمها وترد على حاجة تانية وبتفصل منك كتير.  
3 - الحنجورية أكتر حد ممكن يقاوح بالباطل ويلوى الحقائق لمجرد إثبات صحة موقفها، وعليه هتكون عنيدة لأقصى درجة وكل حواراتها معارك ولازم تنتصر فيها ناهيك إنها تجيد المراوغة واللف والدوران يعنى هاتطلع غلطان فى كل الأحوال.
4 - الحنجورية «خبيثة» وقلبها «أسود» و(قلبتها والقبر) يعنى ممكن تبقى فى حضنك وهى بتفكر فى مشكلة فى شغلها.. هاتبقى معاك جسد بس يا معلم عشان تفكيرها ودماغها دايما فى شغلها.
5 - الحنجورية مش بتشوف فى المراية غير نفسها يعنى أى معادلة صفرية هاتخسر فيها، وببساطة لما تفكر تقعدها فى البيت هاتقولك طلقنى ولا إنى أقعد فى البيت أنا زيى زيك إن مقالتش أنا أحسن منك.
6 - دايما بتاخد من الدين اللى على هواها يعنى لما تقولها اضبطى لبسك تقولك أنا أحسن من الشمال، ولما تقولها «علاقاتك كتير» تقولك أنا «خالص» ده فلانة بتصاحب وأنا لا.. والدين عندها عبارة عن حسن معاملة النبى صلى الله عليه وسلم والصحابة لزوجاتهم وبس.
7 - آخر واحدة ممكن تبهر بيك أو بشغلك ودايما مهما نجحت هتشوفك شخص عادى عشان هى متصورة إنها لو معملتش كده هاتتكبر عليها وهى فى المطلق «مغرورة»
8 - تبحث عن كل الحقوق ولا تفكر فى واجبات.. يعنى تلاقيها مستنية الشقة والعربية والحب والبوس والاحضان وفتح باب العربية وبوكيه الورد والتقدير أمام أصحابها والأهل والجيران وإنك تعملها «مساج» – انتا مش هى – وتبوس الأيد والرجل كمان وده كله بلا مقابل.. مش هتفكر هى تستحق كل ده ليه كل اللى هتفكر فيه إن ده طبيعى وحق لمجرد إنها قبلت تتجوزك.
9 - الحنجورية فيها داء صعب وهو «المقارنة» دايما هتقارن نفسها بصحباتها اللى أزواجهم بيهشكوهم ويدلعوهم وتفضل تحزن على عمرها ولما بتخلف حضرتك بتبقى صفر على الشمال عشان اهتمامها الاول والأخير بأبنائها عشان يكون لها الكلمة الأولى والأخيرة عليهم.
10 - لما تختلفوا مش هتسمعك.. تقول مهما تقول .. تصرخ مهما تصرخ.. هاتكمل كلامها زى القطر ولا كأنك بتتكلم وتقرر إنها تاخد جنب عشان تربيك «فاكراك فأر تجارب»، وفى اللحظة ديه أوعى تتكلم لأنها مش هتسمعك «سيبها وامشى».
11 -  الحنجورية لسانها طويل ولو كانت مؤدبة هاتبقى غلاطة وهتعايرك بكل اللى تفتكره ومش بس كده ده هتجيب لك القديم والجديد من يوم ما عرفتك «وديه الحاجة الوحيدة اللى مفيهاش زهايمر».
12 - طول الوقت هتعيش على أعصابك لأنها دايما متوترة وبترجع فى كلامها وسريعة فى اتخاذ القرارات حتى لو كانت غلط، وكمان «ملهاش كبير» لأنها شخصية متمردة بطبعها يعنى لا هتعرف تكلم لها أب ولا أخ كبير... دايما شايفة إن هى كبيرة نفسها.
13 -  الحنجورية بتستلذ بنظرات الاعجاب دايما لها سواء لشغلها أو ملبسها أو مظهرها بشكل عام وعليه كلمة بره تسمعها «خسيتى» بقيتى مزة.. الخ بالنسبالها أهم مليار مرة من قصيدة منك..