الماء والخضرة والوجه الحسن

مذيعة راحت دار مسنين تعمل ريبورتاج
نقت أكتر تلاتة عواجيز
وبدأت معاهم حوار
• صباح الخير يا حاج
- صباح النور يا بنتى
• عيني عليك باردة
بسم الله ما شاء الله
عايزين حضرتك تقول لنا
الواحد إزاي يقدر يحافظ على نفسه زيك كدا؟
- والله يا بنتى
بـ يقولوا الماء والخضرة والوجه الحسن
أنا بتاع الماء
عشت عمري كله فـ راس البر
هنا بحر وهنا نيل
الصبح مية، الضهر مية، بـ الليل مية
• ما شاء الله!
حضرتك كام سنة؟
- 73 سنة
• وحضرتك يا حاج (لـ التانى)
- أنا تخصص خضرة
ما سبتش بلدنا عمرى
غير لما جيت هنا من سنتين
قاعد وسط الغيط
الصبح خضرة، الضهر خضرة، بـ الليل خضرة
• ما شاء الله!
حضرتك كام سنة؟
75
• وحضرتك؟ (لـ التالت)
- الوجه الحسن بقى، الوجه الحسن
وجه حسن على كل شكل ولون
ما عتقتش
الصبح وجه حسن، الضهر وجه حسن، بـ الليل وجه حسن
• ما شاء الله!
حضرتك كام سنة؟
- 28.•

اعتراف


مرة
مجلة الشعر
طلبت منى أعمل حوار مع أحمد فؤاد نجم
وطلبوا حوار مطول ست صفحات من المجلة
أو تمانية مش فاكر
طبعا
الحوار مع نجم
خصوصا ل مجلة جادة
حاجة مستحيلة
أولا مش هـ تلاقيه
ولو لقيته يديك ميعاد
ومش هـ ييجي
ولو جه مش هـ يبقى فايق
ولو لقيته قادر يتكلم
هـ يفضل يتكلم فى اللي هو عايزه
ويقول لك حكاية
حكاها قبل كدا
بس بـ تفاصيل تانية خالص عكس الأولى
ولو طبيت عليه ف البيت
هـ تلاقيه نايم
فضلت أطارده شوية كدا
بعدين قابلت أشرف عبشافى
كان رايح له ب مصلحة
قلت له يا أشرف
إن كان على الحوار مش مهم
إنما المكافأة بتاعة الحوار
حرام تطير
راح أشرف وكلمنى من عنده
قال لى
أبو النجوم ب يقول لك
ما تكتب أنت الحوار
هو أنت صغير؟
بعدين ضحك
وقال له هو:
حاضر حاضر
طبعا نجم كان عايز يوصل لى شتيمة
بس يا سيدى
قعدت كدا أألف الحوار
حاجة لوز العنب
وبعته المجلة واتنشر
وخليت معايا نسخة
علشان لما أقابل نجم عند هاشم فى ميريت
قابلته
وريته الحوار
أتأكد إنه مش هـ يعترض على حاجة
قرأ كدا شوية
بعدين قال لى
عفارم عليك يا ابن الش.....
أنا مكنتش هاعمله كدا.•

مطرب العار


لما عملوا العار مسلسل لـ الأسف
جابوا آدم المطرب يغنى التيتر
وكان لسه مش معروف أوى
قرب العيد
بدأوا يحطوا دعاية حفلات ليلة الوقفة
فـ كانوا معلقين يافطة
لـ سهرة فى الهيلتون باين
نجم الحفل
آدم
مطرب العار. •

سمعة أبو لهب


بعد فيلم الرسالة بـ شوية
توفيق الدقن قابل مصطفى العقاد
قال له:
إزاي مصر كلها تمثل فى الفيلم
وأنا ما آخدش أى دور
ولا أنت مش معترف بى ممثل؟
العقاد قال له:
إطلاقًا
أنت أول واحد رشحته
بس قلت إنك بـ تمثل دور الشرير
فـ ما حبتش يعنى تبقى من رموز الإسلام
الدقن رد:
يعنى إنت خايف على سمعة الإسلام منى؟
طب ما كنت ادينى دور أبو لهب
ولا خايف على سمعته هو راخر؟.•

الحل


مما ورد فى الأثر
عن مولانا نجيب محفوظ
فى حوار صحفى ليه
أجراه لـ مجلة أجنبية:
لى أصدقاء مصريون كثيرون
يستشيرون شيوخ الصوفية
باحثين عن حلول
ربنا يوفقهم
لكن الحل الحقيقى لمشكلاتهم
فى البنك الأهلى. •


بس كدا


«و أنا يعنى بـ أجيب لعيبة منين؟
ما هم هم نفس اللاعيبة من نفس السوق
اللي بـ يجيب منه دجلة والنصر والأسيوطى
هـ أروح أجيب لاعيبة يعنى من برشلونة؟
فى مصر مفيش فرق بين اللاعيبة»
تصريح لـ الكابتن إبراهيم حسن
مدير الكرة بـ نادى الزمالك
2015
«إحنا بـ نعض فى الصخر
ماعندناش ميزانية نجيب لاعيبة
زي بتاعة الأهلي والزمالك
دي ناس ميزانياتها رهيبة
وعندها أحسن لاعيبة فى مصر»
تصريح لـ الكابتن إبراهيم حسن
مدير الكرة بـ نادى المصرى
2018
 

فالانتاين


السنة اللى فاتت
فى الفالانتاين
لقيت حد كاتب بوست
بـ يشتكى فيه
إنه هـ يقضى اليوم لـ وحده
كان بوست ظريف
مش فاكره دلوقتى
لـ إنى لما طلعت أشوف اسم اللى كاتب
لقيته الواد ابنى الكبير
إيثار المحمدى
عملت له بلوك طبعا
بس برضه
واجب أطمن عليه
هو لسه سينجل
ولا زماني بقيت جد. •


شغلانة حلوة

هو أنا أو حضرتك أو حضرتها
لو أى حد فينا
تولى تدريب الأهلى أو الزمالك
هـ يحصل إيه مختلف عن اللى ب يحصل؟
فى الأهلى
هـ ياخد الدورى ويمشى فى نهاية الموسم
وفى الزمالك
هـ يدرب شهر
يفوز ماتشين ويتغلب ماتش
يمشوه
وياخد الشرط الجزائى
إكنه كمل الموسم
حيلوة أوي الشغلانة دى
يا رب اوعدنا. •