اسمحيلى

عارفة لما تكونى حتة

منى يعنى كلى منك

عارفة لما تدوبى حبة

وأما تنسى غصب عنك

إن أنا مش هو خالص

وإن مش شايفانى فارس

وإن حبك مش عشانى

أوحشك.. أو توحشينى

كله عندك زى بعضه

وأنتى عندى حاجة تانى

ف اسمحيلى....

أفتح الشباك عيونى

أفتحه وتطلى منه

سهّى شوقى واحكى عنه

احكى أى كلام ف حبه

مش مهم تقولى إيه

بس نفسى تكلمينى

اسمحيلى أكون ف ضلك

أو وراكى بخطوتين

أبقى جنبك

تبقى جنبى

أبقى ضحكة ف شفتين

نفسى اسمع اسمى منهم

نفسى أغمض عين وعين

وأصحى آلاقى حضنى أنتى

أختى أمى حياتى بنتى

طفلة لسه بسنّتين

اسمحيلى أحب فيكى

واشبكك وردة ف هدومى

تكبرى واكبر معاكى

اسمحيلى تكونى يومى

من صباحه لحد آخره

وأما ييجى بكرة أقوله

لسه يومنا منتهاش

إنتى بكرة وإنتى بعده

حتى لو مش هتشوفينى

املى كل فراغ ف عينى

خلى كل الناس ملامحك

قلبى سامعك

وأنتى ساكتة مبتقوليش

ف اسمحيلى إنى أعيش