هؤلاء يشبهون هؤلاء وكلها أرزاق
شبه مين وفين؟!
تحقيق: محمد القمحاوى - كريم عبدالكريم
يخلق من الشبه أربعين، هذا التعبير الأمثل فى الفترات الأخيرة عن ظاهرة أشباه الفنانين ولاعبى كرة القدم، حيث ظهر مؤخرا عدد من الأشخاص يشبهون فى الشكل بعض الفنانين واللاعبين، ما أثار الجدل على مواقع التواصل بمجرد تدوال صورهم وبعدها ظهروا فى البرامج التلفيزيونية واحتلوا الترند، وكان الشبه سببًا في فتح أبواب الرزق ولفت الانتباه لشبيه لمحمد صلاح، نجم نادي ليفربول، وكذلك شبيه للنجم العالمي ليونيل ميسي. وعلى الصعيد الفني، برزت شبيهة للفنانة عبلة كامل وشبيه الفنان أمير كرارة وغيرهم في الماضي.
وهؤلاء الأشباه لم يكتفوا بالتشابه، بل أنشأوا منصات على مواقع التواصل الاجتماعي، بما فى ذلك قنوات على يوتيوب، وجذبوا متابعين من مختلف أنحاء العالم. من هنا قررت مجلة «صباح الخير» فى هذا التحقيق تسليط الضوء على هذه الظاهرة، والكشف عن الأسباب التى تدفع هؤلاء إلى استغلال هذا التشابه وكيف استغله بعضهم؟
أمير كرارة
البداية مع عبدالله عبد السلام شبيه أمير كرارة وهو يعمل حاليا موظفا فى ميناء الإسكندرية، إلى جانب امتلاكه مشروعا صغيرا ويحكى قصته قائلا: إن قصة الشبه بينى وبين الفنان أمير كرارة بدأت مع عرض مسلسل كلبش.
وأوضح أنه لم يكن ينتبه لهذا الشبه فى البداية ولكن الناس هى التى بدأت تلاحظه مع بداية عرض المسلسل.
«فجأة الناس كلها بدأت تقول لي: أنت شبه باشا مصر، ما كنتش واخد بالى من الموضوع ده خالص». وتابع: أنا ماغيرتش أى حاجة فى شكلى عشان أكون شبهه أنا شفت إن الناس رأتنى بالشكل اللى أنا فيه وقالوا إن فيه شبه، لكن على المستوى الشخصى مش بحب أتشبه بحد مهما كان الشخص ده محترم زى أمير.
ورغم أن الشهرة كانت أكبر فائدة حصل عليها من هذا الشبه، إلا أن عبدالله أكد أنها جاءت بتكلفة عالية حيث قال: «الناس بدأت تتعامل معايا وكأنى شخص مشهور جدا وده زاد من الطلبات المادية على بشكل مبالغ فيه كتير من الناس بيعتقدوا إنى عايش حياة مرفهة لكن الحقيقة غير كده».
عبدالله أوضح أيضًا أنه لم يحقق أى استفادة مادية تذكر من الشبه بينه وبين أمير كرارة، مضيفا ما حققتش أى مكاسب مادية بالعكس صرفت كتير على ورش تمثيل ومحاولات للشهرة، لكن ما فيش عائد كبير.
ويضيف: كنت فاكر إن الشبه ده هيفتح لى أبواب، لكن فيه جهات فى مجال التمثيل عاملة لى بلوك بدون ما أعرف السبب.
وعن تواصله مع الفنان أمير كرارة، قال عبدالله: ما حصلش أى تواصل بينى وبينه. كنت متوقع إنه ممكن يكون فى دعم أو اهتمام، لكن ده ما حصلش للأسف.
ساديو مانى
بملامح متقاربة جدا ظهر عبدالرحمن رجب، شبيه لاعب السنغال المعروف «ساديو مانى» الذى أثار ضجة كبيرة على مواقع التواصل بعد نشر فيديوهات له على تطبيق تيك توك، ولفت انتباة الملايين خلال فترة قياسية.
يقول عبدالرحمن: «قبل الشهرة كنت شغال فى شركة تكنولوجيا ومعلومات وبغنى راب، بعد كده «ماني» ظهر فى ليفربول وواحد من أصدقائى قالى إنت شبه ساديو مانى لاعب السنغال، اتفرجت على أول ماتش لساديو مع الليفر وعرفت إن الشبه قريب جدا وفى نفس السنة كانت مصر بتنظم أمم إفريقيا والحظ الكويس فريق السنغال جاى مصر ومن هنا ابتديت أروح أتفرج على ماتشات السنغال».
ويوضح عبدالرحمن: «ومرة فى مرة لقيت نفسى اتعلقت بالموضوع أكتر والناس بتتصور معايا فى الاستاد ومن هنا جت الفكرة إنى أقلد الاستايل».
وعن الاستفادة من الشهرة يوضح قائلا: بدأت أشتغل على التيك التوك، وبالمناسبة كنت أول شبيه أظهر وقتها فوجئت دعم من الإعلانات وأول إعلان لى كان مع كابتن مؤمن زكريا ربنا يخفف عنه كان إعلان كابيتانو، تانى إعلان كان فى أبلكيشن football fantasy.
يكمل: «وبعدها اشتغلت مع إمبابى وطلعنا فى ألف حمدلله على السلامة مع النجمه يسرا، وبعدها اشتغلت مع نور خالد النبوى فى فيلم الحريفة، وعملت إعلان هارديز نزل فى السعودية».
«سافرت دبى أنا وإمبابى وميسى وصلاح اشتغلنا شويه ورجعنا فى كذا إعلان بس بره الميديا، حاليا شغال على نفسى الحمدلله وفى مفاجآت لينا فى رمضان ومع مخرج كبير».
وعن مقابلته للاعب السنغالى مانى قال: قبل آخر ماتش مكنتش عارف أتواصل مع مانى وقتها كنت تريند على جميع التواصل، بعدها مباشرة قابلته فى التجمع الخامس فى أحد الفنادق، كانوا معسكرين هناك وإتصورت مع ساديو مانى وأول ظهور لى أمامه تعجب جدا.
صلاح فى الجيزة
عبدالرحمن عادل خريج المعهد العالى للعلوم الإدارية وحاليا محاسب فى إحدى الشركات أثار ضجة كبيرة بما يتميز به من الشبه بينه وبين اللاعب محمد صلاح الذى بدأ بتقليد ضحكته ونبرة صوته وطريقة المشى. قال عبدالرحمن: أنا من إمبابة، وكل الناس فى المنطقة بتشوف إزاى تبقا ملهوفة إنها تتصور معايا، أنا كنت بمشى فى شارع وأى مكان بروحه بشوف الناس والأطفال بتتصور معايا على أساس أنى محمد صلاح اللاعب الكبير.
أكمل: «ودى حاجه بتفرحنى إن شبه حد زى الأسطورة محمد صلاح لحد مع صحابى فى يوم بعتوا صورتى لشبيه إمبابى اللى برضو نسخة طبق الأصل ليه وبدأت أعمل مقاطع فيديو بس طبعا فديوهات تحمل محتوى لكوره، الموضوع بدأ يكبر أكتر والناس اعتادت تجرى تتصور معايا».
قال: من ضمن المواقف أنا بنزل الشغل بتاعى 9 الصبح بشوف الأطفال فى الشارع موجودة تحت البيت بس عشان تسلم عليا وده إحساس جميل جدا، وإنت ماشى الناس تشاور عليك.
أما هند العبد 38 سنة من مواليد مدينة طنطا ومقيمة بشبرا الخيمة متزوجة ولديها ولد وبنت، حاصلة على بكالوريوس خدمة اجتماعية، بخفة دمها والملامح المتقاربة جدا ظهرت فى مهرجان القاهرة السينمائى بنفس استايل الفنانة عبلة كامل وبعدها بدأت الفيديوهات على تيك توك ومن هنا بدأ شهرتها. قالت هند: «كنت ممرضة فى مستشفى خاص، اشتغلت فى سنتر تعليم تمهيدى للأطفال، بدايتى بالشبه كنت فى مرحلة الإعدادى زمايلى كانو يشبهونى بشخصية سنية فى مسرحية وجهة نظر وبعد سنوات من زواجى كان زمايلى فى الشغل بيندهوا عليا باسم عبلة والدكاترة فى العمل عبلة، من بعدها اشتهرت فى السوشيال ميديا والمخرجين ومكاتب الكاست طلبونى للتمثيل وبدأت الظهور فى البرامج التلفزيونية». تضيف: أول عمل لى اشتركت فى فيلم قصير اسمه الأرض الملعونة للمخرج محمد النحاس وأخذت جائزة أفضل ممثلة من مهرجان السلام السينمائى الأردني، وعرضت أكثر من عرض على خشبة مسرح الهوسابير ومسرح ساقية الصاوى ثم اشتركت فى فيلم سموكى إيز لمطرب الراب مروان موسى والفنان حسن أبو الروس والمخرج العالمى على على وفيلم لوكاندة خمسه مع الفنان حجاج عبد العظيم للمخرج محمد بيومى فؤاد، واشتركت فى مسلسل رمضان حضرة العمدة للفنانة روبى المخرج عادل أديب ثم اشتركت ببطولة مع الممثل الكويتى محمد بوخورشيد مسلسل «كاميرا خفيه» وإزيك يا كابتن للمخرج الكويتى محمد السلمانى واتعرضت بقنوات الكويت والسعودية».
وتوضح: الحمد لله بشكر ربنا على حب الناس وتفاعلهم معايا بكل حب واحترام بيعبرو عن فرحتهم بيا لما بيشوفونى على شاشة التليفزيون أوحتى فى الشارع وبيدعولى بالتوفيق ونفسهم يشوفونى فى أعمال تلفزيونيه كثيرة.
تقول: وموصفش سعادتى بكل هذه المحبة من الناس وكل مرة بحاول أثبت وجود هند العبد وبشكر ربنا على هذا الشبه الكبير بينى وبين الفنانة عبلة كامل ولكن لى شخصيتى المستقلة وأسلوبى حتى فى التمثيل لأن لازم يكون لى شخصية مستقلة بعيدة عن الشبه.
وأكدت هند على تواصلها مع الفنانة عبلة كامل قائلة: كلمتها وتواصلنا هاتفيا وابنتها نزلت منشور لى على الفيس بوك قالت: «البنت دى شبه ماما جدا ما شاء الله كمان ماما حبت فيديوهاتها، وبعد لقائى على التليفزيون مع برنامج واحد من الناس مع الإعلامى عمرو الليثى تواصلت معى وعبرت عن وجودى بالحب وتمنت لى التوفيق».
حكاية ميسى
إسلام محمد إبراهيم بطاح من قرية الكفر القديم بلبيس محافظه الشرقية صاحب شركة تشطيبات فى العاشر من رمضان.
يقول: أيام الجيش أصحابى كانوا بيقولوا لى إنت شبه «ميسي» وأنا ما كنتش مهتم بالموضوع، بعد ما خلصت الجيش طبعا اشتغلت عند صديق ليا وفضل يقولى تعالى نعمل فيديو نزله على مواقع التواصل وفكرت كثير قبل ما أنزله.
أضاف قبل ماتش الأهلى وبايرن ميونخ عملنا فيديو كوميدى على تحليل المباراة والفيديو طلع ترند لقيت الصفحات بتكلمنى والوكالات عاوزين يصوروا معاى وعلشان كده نمت إسلام صحيت لقيت نفسى ميسى فجأة.
يكمل: بعدها بدأت البرامج التليفزيونية تكلمنى وبدأت أظهر والموضوع سبب لى فرحة كبيرة ومن وقتها بدأت أصور فى مناسبة وأكون ماشى فى الشارع تلاقى الأطفال الصغيرين ينادون عليك واشتغلت فى مسلسل ألف حمد لله على السلامة وإعلانات كنت دوبلير لميسى.