إسكندرية تانى

الملف إعداد: إسراء أبو بكر و ياسمين عبدالسلام

كلمات : أحمد فؤاد نجم.. ألحان: عمار الشريعى.. غناء: محمد الحلو.. مسلسل زيزينيا 1997

ريشة الفنان: محسن رفعت
إسكندرية تانى وآه م العشق يانى
والرمل الزعفرانى ع الشط الكهرمانى
والسحر اللى احتويته والبحر اللى احتوانى
والبحر أبو ألف موجة
والموجة بألف حالة
وأنا المُغرم صبابة
بإسكندرية يابا
وفكرة كونى أنسَى
فحُكم الاستحالة
فحُكم الاستحالة
عشقت بحرك وغرقت فيكى
وصبحت عندك ف العشق حالة
وسمعت منك وعشئت بيكى
وعجبنى قربك على أى حالة
وعاشرت فيكى الخواجة يَنّى
اجريجى لكن مصراوى جِنّى
إسكندرانى عاشق أغانى
جعان يغنى شبعان يغنى
ويبات فحالة يصبح فحالة
وكونه ينسَى دى الاستحالة
وسمعت صوت النديم نسايم
ع البحر صابحة والبحر هايم
وسمعت سيد بيقول يا مصرى
الدنيا صاحية ليه أنت نايم
ولمّا عاند وخانّى عصرى
لا شد ضهرى ولا خد بنصرى
رميت فحضنك ع الرملة أصرى
وفتحت ع البحر حضن مصرى
آدى القضية وآدى الرسالة
وكونى أنسّى دى لاستحالة
••
وعمار يا إسكندرية يا جميلة يا ماريا
وعْد ومكتوب عليّا ومسطر ع الجبين
لاشرب م الحب حبة وانزل بحر المحبة
وأسكن حضن الأحبة والناس الطيبين
حكاياتك يا زيزينيا حواديت وناس ودنيا
فى حوارى إسكندرية وليالى المنشدين
وأمّا التاريخ يواكب ويزاحم بالمناكب
يتعبَّى ف المراكب وغناوى الصيادين
هيلا هيلا وهيلا بيلا شيال والعمر شيلة
وهموم الدنيا ليلة فيها القمر حزين
ويا موج بحر الليالى عديتك وانتَ عالى
ودفعت المهر غالى بالأيام والسنين
وعمار يا إسكندرية يا جميلة يا ماريا