المغامرة الكبرى

2 فبراير 1996
كنا فى رمضان
قاعدين فى بيت صاحبنا بندق
تامر عبد الوهاب، وحسن زيزو، وبندق
ومحمد فتحي
(اللى هو ناصر فتحي
الأخ الصغير لـ هويدا فتحى زميلتنا)
وأنا
أذن المغرب
فـ كل واحد منا قضم قضمتين بـ الظبط
من ساندوتشات فول كنا مجهزينها
بعدين عبد الوهاب بص لنا بـ منتهى الجدية
وقال بـ حسم:
يالا يا رجالة
****
فلاشباك
قبل كام يوم
كنا شلة الأصدقاء دي
مرتبطين بـ تنظيمات سياسية مختلفة
كنا بـ نجتمع مع بعض
ونشتكى من ركود الحالة
وتكلس الأوضاع
مفيش أى مد ثورى سعادتك
كلنا اتفقنا
على إن السبب الحقيقي
وراء حالة الخمود اللى بـ تعيشها الأمة
(كل واحد فينا حسب أمته)
هو إننا مش بـ ننزل لـ الناس
حسينا بـ رضا كبير عن نفسنا
إننا فهمنا سر الكون
وعرفنا اللى الناس قبلنا ما عرفهوش
(مكناش نعرف
إنهم عارفين وساكتين)
وقتها تعبير «ننزل لـ الناس»
معناه الاتصال بـ الشعب
والخروج من دايرة التنظيمات الضيقة
سواء كانت فى الجامعة أو غير الجامعة
كل التنظيمات اليسارية ساعتها
كان ممكن تعزمهم ع الغدا عندك فـ البيت
لو شقتك واسعة شوية
مكناش حاسين أبدا
إن كلمة «النزول» بـ تفترض ضمنيا احتقارهم
وإن كلمة «الناس»
معناها «كل اللى مش مننا» لكشة واحدة
مكناش فاهمين حاجة
كنا حافظين كتب كتير
لـ كتاب ومفكرين كتير
بس مكناش فاهمين حاجة
ما علينا
طب نعمل إيه يا إخوانا
علشان «ننزل لـ الناس»
زيزو اقترح تنظيم مسلح
عبد الوهاب كمل الاقتراح دا
بـ إنه قرا كل كتب جيفارا
أو اللى اتكتب عنه
وفكرته واسعة
عن كيفية إدارة حرب عصابات ضد النظام
بندق ومحمد فتحي
(اللى هو ناصر فتحى أخو هويدا فتحي)
كان عندهم تحفظ
على العنف من حيث المبدأ
بـ غض البصر عن فرص نجاحه
أنا كنت جى ف أى حاجة
وإن كنت أميل
لـ تجربة أدوات كتير ما جربنهاش كفاية
مع إنها فاعلة
زى الشعر والأغاني
لكن معاكم
بعد مناقشات طويلة مستمرة
استقرينا على فكرة تأجيل السلاح
بس هـ نعمل إيه؟
نطبع منشورات ونوزعها؟
مفيش فلوس
كلنا على بعضنا
ممكن يكون فـ جيبنا 85 قرش
واللى بـ يمولوا الحاجات دي
بـ يشترطوا انشطة معينة وشعارات معينة
ممممم
محمد فتحي
(اللى هو ناصر فتحى أخو هدى فتحي)
اقترح نرش سبراى ع الحيطان
رغم إنه كان أصغرنا
لكن عجبنا ذكاؤه
مش محتاجة فلوس
أكيد مش هـ نغلب
نجمع 350 قرش
نشترى بيهم عبوتين رش
(خدناهم من دكتور أبو العز
ادانا تمنهم
وتمن عشر ساندويتشات فول
والميركوباصات
بريزة مقفولة
عشرة جنيه)
لكن يفضل الخطر!
الموضوع مكنش سهل إطلاقا إطلاقا
كانت منتشرة وقتها
قصة المحافظ المجنون
اللى البوليس اشتبه فـ ابنه
فـ صفوه بـ النار
لما الموضوع وصل لـ مبارك
وعرف إن أبو الواد بتاعنا يا ريس
فـ راح جابه وصالحه
وعينه محافظ محافظة بعيدة عن القاهرة
بس الراجل كان اتجنن
فـ عادى ممكن يصفونا مطرحنا
جوه الجامعة دا بتاعنا
إلى حد ما
لكن براها
ما أضمنكش
تفتق ذهن حد مننا
(وارد أكون أنا
مش فاكر)
إن رمضان داخل
الشوارع ساعة المغربية
مش بـ يكون فيها صريخ ابن يومين
لأ
فيه ناس بـ يبقوا مروحين
نستنى عشر دقايق
عشر دقايق بـ الظبط
اللى مروح هـ يكون روح
ومحدش هـ يكون لسه خرج
تمام
ويوم 2 شهر 2
ميعاد التنفيذ
كانت الخطة
إننا هـ نكتب على سور جامعة القاهرة
اللى فى شارع السودان
اتنين يكتبوا ع الحيطة
وواحد يقف ع الرصيف التاني
يكشف شارع ثروت
وواحد يقف على الرصيف بتاعنا
يكشف اللى جى من كوبرى فيصل
وواحد يقف فى شارع ثروت
يراقب حرس الجامعة
توزيع الأدوار مكنش صعب
أنا ومحمد
(اللى هو ناصر فتحى أخو هويدا فتحي)
هـ نكتب
هى المهمة الأخطر
بس الأسهل
وإحنا كنا الأصغر والأخف وزنا
فـ نعرف نجري
وزنى كان 64 كيلو
قبل ما يوصل 80
على نهاية سنة 1996 نفسها
بندق
هـ يقف ع الرصيف المقابل لينا
زيزو ع الرصيف بتاعنا
عبد الوهاب يراقب حرس الجامعة
الاتنين اللى بـ يكتبوا
لازم كل واحد منهم
يكون مجهز بـ الظبط هـ يكتب إيه
مش يقعد يفكر ساعتها
واللى هـ يكتبه
يكون حده الأقصى كلمتين أو 15 حرف
علشان نخلص من النحو
وهل «و» و»لـ» كلمات مستقلة ولا لأ
محمد
(اللى هو ...... )
اختار يكتب «فلسطين عربية»
وأنا اخترت
«الموت لإسرائيل»
الناضورجية
كل واحد هـ يلبس قميص
عليه جاكيت
أول ما يشوف حد
يروح قالع الجاكيت
علشان ما يضطرش
ينبهنا بـ الصوت
فـ إحنا لازم نكتب بـ سرعة
وعينينا متعلقة على الناضورجية
بص لنا عبد الوهاب
واحنا فـ بيت بندق
بعد ما قطمنا قطمتين الفول
وقال: يالا
نزلنا جري
من غير ما نكلم بعض حرف
بعد المغرب بـ عشر دقايق بـ الظبط
ساعة الصفر
كنا فى مكان العملية
نزلنا من الميكروباص
كل واحد خد مكانه
وبدأنا نكتب
****
محمد
(......فتحي)
بص لقى حد جى علينا بـ سرعة
من ناحية بندق
قال لي
بوليس
هو ما وصلش السين
كنت أنا فى الأتوبيس
أتوبيس إيه؟
ولا أعرف
أنا جريت
زى ما تكون صفحة وورد
من نت فائق السرعة
لقيت جنبى أتوبيس
نطيت فيه
وأثناء ما بـ أنط
رميت علبة الرش
وخمس دقايق كنت فى التحرير
كنا متفقين
إنه محدش يستنى التانيين
اللى يخلص مهمته
أو لما يحصل كبسة
كل واحد مسئول عن نفسه
ونتقابل فى القهوة
طبعا فى القهوة
مكنش فيه حد منهم
بس ربعاية كدا
وجم الأربعة
إيه اللى حصل يا إخوانا؟
عرفت إن محمد (... فتحي)
جرى على كعبول
وراح مزعق فيه
اقلع الجاكيت
اقلع الجاكيت
الراجل اللى جى علينا
(اللى لـ حد لحظتنا دي
فى 2018
محدش يعرف هو مين
ولا بـ يشتغل إيه)
كان وصل عندهم
وقفشهم
ويا ولود ال.... يا إرهابيين
عبد الوهاب وزيزو كانوا جتت
طول بـ عرض
وشكلهم مش طلاب جامعة نهائي
دا بـ بغض البصر
إنهم كانوا فعلا أكبر مننا سيكا
عبد الوهاب وزيزو اتقدموا بـ منتهى الثبات
ووصلوا مكان الراجل والولدين
وراح عبد الوهاب رازع محمد (...) قلم
يا ولاد ال....
وعكشه من ياقته
وزيزو عكش بندق
الراجل قال لهم
واخدينهم على فين
زيزو بص له البصة بتاعته
اللى كنا بـ نخوف بيها طلاب دفعة سنة أولي
فـ الراجل قال له
تمام يا باشا
وخدوهم كدا مسافة 200 متر مثلا
وجرى هم الأربعة
قعدنا نضحك نضحك
وسألت فتحي
إيه ما خلاكش تهرب
وكانت خلصت
ما هم ما يعرفوش
إن بندق وزيزو وعبد الوهاب معانا
قال لي
ما أعرفش
بس أنا كنت مسستم نفسي
على إنى أهرب
لما هو يقلع الجاكيت
فـ جريت أقول له يقلع الجاكيت
ضحكنا تانى وضحكنا وضحكنا
يااااااه
العيال دى راحت فين؟
معقول إحنا دول
يالا
خيرها فى غيرها