الذكاء العاطفى

الأول نعرف المقصود بالذكاء العاطفى وبعدين نشوف حكاية الذكاء العاطفى فى الزواج دى إيه..

الذكاء العاطفى باختصار هو إنى أفهم مشاعرى عشان أعرف أديرها وأتعامل بيها من غير ما أنا أبقى بضايق نفسى ولا أبقى باسمح لغيرى يضايقنى عمّال على بطّال ولا أبسط نفسى على حساب غيرى بلا مبرر غير إنى مبسوط كدة مثلًا وأنا باقلل من اللى معايا وبضحك وبكركر وأنا عمّال أضغط عليه.

أفهم مشاعرى عشان أفلترها وأعرف إيه الحاجات اللى بتضايقنى وإيه اللى بيبسطنى وليه.. وبالتالى أقدر أنا أسوق مشاعرى فى الاتجاه اللى أبقى راضى عنه ومريحنى.

طيب الذكاء العاطفى ده مكتسب ولا مولودين بيه؟ يعنى أنا لو مولود غبى عاطفيًا يبقى خلاص اتكتب عليّا أعيش طول عمرى غبى؟ الحمدلله إن الإجابة: لا. 

فى ناس فعلًا عندها ذكاء عاطفى بالفطرة لكن الأغلب إننا بنحتاج نراقب نفسنا ومشاعرنا لفترة عشان نتدرب على فهمها والتحكم فيها.

طيب إيه علاقة ده بالزواج؟ الذكاء العاطفى فى الزواج هو إنى أقدر أتقبل اختلاف الآخر بحب من غير ما اسمح للاختلاف ده إنه يضايقنى وينكد عليا عيشتى.. هو إنى أبقى فاهم إن الاختلاف سنة الحياة، وإن الطرف الآخر لازم أخده على بعضه كده شروة واحدة وما ينفعش أقعد أنقى وأفصص فى شخصيته وطباعه.

أحاول مع نفسى تقبل ما يمكن تقبله وتفادى الصدام بذكاء مع ما لا يمكن تقبله وتوصيل الحاجات اللى مش قادر أتقبلها للطرف الآخر فى رسالة لطيفة وحاسمة عشان سلامتى النفسية ليها حق عليا.

هو إنى أفهم أن مشاعر الغضب ما ينفعش أطلعها فى وجه الطرف الآخر لأنها هتعمل شروخ وجروح ممكن ما أعرفش أصلحها وإن لازم يبقى فى مقدار من التحكم بذكاء فى إيه اللى يتقال للطرف الآخر وإمتى وإيه اللى لو اتقال هيبقى ضرره أكتر بكتير من فايدة إنى أطلع غضبى بدون سيطرة.

حد هناك بيقول لا؟ هو أنا هاقعد أفكر فى كل كلمة فى بيتى كمان قبل ما انطق؟ أنا بحب أبقى على طبيعتى والكلام ده مش متوافق مع شخصيتى وأنا مش هغيرها.. الحقيقة أن مش مطلوب فعلًا إنك تتغير.. وتلقائيتك دى حاجة مقدرة وجميلة.. إلا فى أوقات الغضب لأننا عادة بنحدف طوب لو سايبين نفسنا على راحتها تمامًا وكل اللى مطلوب هنا إنك تمسك نفسك شوية لحد ما تهدى وبعدين تقول اللى عايزة بشكل مخفف زى بالضبط ما بتعمل أما مديرك فى الشغل بيغلس عليك،  ولازم تعرف أن مديرك فى الشغل مستحيل يفضل مديرك طول العمر وممكن عادى تستقيل وتسيبه، فمن باب أولى عادى لو انفجرت فيه أو جرحت مشاعره إنما شريك حياتك فأنت لو مش مراعى كلامك ومشاعره فللأسف ده ممكن يسيب آثار تفضل طول العمر، لو كملتوا أصلًا بالشكل ده.

كلنا محتاجين نتعلم إزاى ندير مشاعرنا بذكاء وما نبقاش متمسكين بطفولتنا فى حالة الغضب، مش إنك تغير شخصيتك لكن هو إنك تتعامل بنضج عشان ما تأذيش نفسك ونفسيتك فى المقام الأول.