البقية في حياتي

 - يا جماعة إحنا حنفضل محبوسين فى الدرج ده .. إحنا لازم نخرج .. ده أبو الشورف حبيبنا كلنا.
-  ما إحنا لوخرجنا ح نتبعتر ومحدش حيعرف يلمنا.
- صح  ده اللى ملجمنا ومخلينا نمشى عل العجين مانلخبطوش.. ده بجرة قلم منه يطلعنا سابع سما وبجرة قلم برضه يخسف بينا الأرض.
- يعنى إيه ؟!! الراجل يخلع كده من سكات ومنقومش بالواجب.. دى تبقى حتى قلة أصل.
- وإحنا نقدر نعمل إيه يعنى .. ده إحنا حايلله شوية شخصيات كتبها فى سنياريوهاته.
- يبقى مفيش غير حل واحد.. نكتب له نعى محترم.. ونقول فيه الله يرحمه كان سيناريست عسل موهوب ومثقف وحريف طاولة.
- آه بس النعى ده حننشره فين؟
- أى جريدة سينمائية أو حتى مجلة أسبوعية.
- (بحماسة بالغة ) خلاص أنا اللى حأكتب النعى ده.. أنا الشهيدة الفلسطينية (وفاء إدريس) اللى كتب قصة حياتى فى فيلم وخد عنه جايزة فى مهرجان الإسكندرية ولا حد من المنتجين عبرني.. خلونى أفضفض على اللى جوايا.. ما أنتوا شايفين الكلاب بيعملوا إيه فى غزة دلوقتى ولا أنتوا عايزنى أموت مرتين مرة فى الحياة ومرة فى أم الدرج ده!
- انسى يا وفاء انسي.. المنتجين عايزين حاجة فرايحى ما أنتيش شايفة صافيناز مولعة الدنيا إزاى ببدلة أحمر فى أبيض فى أسود.
- خلاص يبقى سيبولى أنا النعى ده أنا راجل كوميدى وأكشن وعينى على شباك التذاكر.
- نعى إيه اللى تكتبه ياض.. ده أنت يادوب سواق ميكروباص بيفك الخط.
- سواق ميكروباص آه.. بس بطل فيلم (رالى الفراعنة) حد سمع عن سواق ميكروباص اشترك بعربيته الترامكو فى سباق الرالى وكسبه.
- وتتداخل الأصوات.. كل يريد أن يكتب النعي.. ويستقرون فى النهاية على اشتراكهم جميعا فى الكتابة.
1- الله يرحمك يا غالى . 2-ياللى قضيت عمرك فى معهد السينما بتؤدى رسالتك يا دكتور. 3- ياللى كتبت فيلم أولى ثانوى واختاره النقاد من أهم مية فيلم فى السينما يا عنيه. 4- ياللى لما كنت تزهق من الكتابة تروح تلعبلك بولة طاولة عند المخرج جمال قاسم وتخلى الشاعر جمال بخيت والمخرج محمد أبوسيف يصرخوا ويقولوا صديق الدش أهه.
فجأة ينبعث فى المكان صوت غاضب: لا .. ده كتير أوى كده أوفر . ويفتح باب حجرتى وتدخل زوجتى ملهوفة.
- مالك يا شرف صوتك جايب آخر الدنيا.
- النور قطع وأنا بأكتب النعى ع الكمبيوتر.
- نعي! نعى مين؟.
- النعى بتاعي.
- أشرف أنت كويس يا حبيبي؟ هو فى حد بيكتب النعى بتاعه بنفسه.
- حبايبى فى صباح الخير قالولى أعمل كده.
تمتمت لنفسها بريبة وهى ترى نور الصباح الباكر عبر نافذة غرفتي.
آآآه .. صباح الخير. •