التمثال

ف وقفتى انتصار

لكنى باختصار

كرهت وقفتى

وكرهت الانبهار

بسر صنعتى ..

وإشارتى للنهار وسحر لفتتى

واحسدكوا يا بشر

ع الصمت والكلام

وضَياعكوا ف الزحام

والغربة والسفر

واحسدكوا يا بشر

للهفة القلوب

لو حست الغرام

أو حست الخطر

واحسدكوا يا بشر

لطرفة العيون

لو خافت الحريق

أو خافت المطر

واحسدكوا يا بشر

وكنتوا تعذرونى لو كنتوا تفهموا

أنا قلبى من حجر

ونظرتى حجر

وبسمتى حجر

ف ساحة الجمال

تمثال ماليش مثال

أثير الانتباه

لكنى مستحيل ..

أحس بالحياه