احكوا لى.. مع: رولا خرسا

معظم المشاكل لها حلول.. نحن نفكر معًا لإيجادها.. ممكن نخطئ وممكن نصيب المهم أننا نحاول.. والأهم ألا نيأس مهما تكاثرت همومنا.

ونذكر بعضنا البعض دومًا بالمثل الشعبى الجميل: تبات نار تصبح رماد .

محدش عايز يتجوزنى !

 

سؤالى غريب أنا عارفة بس هل الرجالة بجد بيحبوا البنت الهادية الكيوت، أنا طبيعية عادى وعادية يعنى بس I feel that I’m alway have something to say، بحس إن كل الهاديين اللى حواليا اتخطبوا واتجوزوا من أول نظرة وبسرعة ما شاء الله بالسبب ده (كان فيه واحدة صاحبتى واحد خطبها قال حسيتها هادية وحبيت هدوءها-مع إنه كان شفنى قبل كده وولا فيه أى حاجة الحمدلله)، أنا آخر تعليق اتقال لى من ولد إهدى شوية! وأنا والله ما كنت أوفر يعنى ولا حاجة! أنا كل القصة إنى بتكلم ع الحاجة بشغف أوى وعينى بتلمع كده وأنا بتكلم عن فكرة معينة وببقى متحمسة خصوصًا إنى ناجحة الحمد لله ومجتهدة فى شغلى ف بيبقى عندى وجهة نظر! أنا والله خايفة أوى خايفة يكون العيب فيا وف شخصيتى وخايفة أفضل لوحدى أوى ومحدش يعجب بيا ولا يكلمنى بالأسباب دى بقيت بفكر تفكير سوداوى وأول مرة أبقى فى صراع مع شخصيتى بعد ما كنت متقبلانى وبحبنى.. هل صحيح ممكن أغير من نفسى  عشان أقدر ألاقى عريس؟ أعمل إيه؟

 

الحل المقترح: مابنعجبش كل الناس !

 

مبدئيا يعنى إيه البنت الهادية؟ اللى ما بتتكلمش؟ ما بتعترضش؟ المصطلح نفسه عمرى ما فهمته.. بس ما علينا.

طالما مش بتتكلمى بقلة ذوق أو بتتكلمى بس ومش عاوزة تسمعى أو صوتك عالى بشكل ينرفز، يبقى خليكى زى ما انتى. أصل لو عملتى حاجة عكس طبيعتك علشان تعجبى حد، يبقى يا إما كمان شوية هترجعى لطبيعتك الحقيقية ويقولك اتغيرتى، يا إما هتفضلى طول عمرك مكبوتة ودى وصفة سريعة للاكتئاب أو الانفجار.

تأكدى إنك مش هتفضلى لوحدك وهتلاقى اللى يشوف ويحب اللمعة اللى فى عينك دى.

هو الترند بس إنهم بيخافوا من البنت اللى عندها عقل وبتعرف تتكلم وبتفهم.. عايزين واحدة تقول حاضر ونعم وبس.

وبعدين الصبر إنتى عندك 24 سنة مش كبيرة خالص.

اطمنى على نفسك هم بيعجبوا بيكى لكن بيخافوا منك بيروحوا للهادية ظنًا منهم إن دى اللى نقدر عليها لكن المتحمسة الشغوفة اللى لها رأى دى احتمال ميقدرش عليها ويمكن كمان تبقى أحسن منى ودى نقطة بترعب الراجل الشرقى جدا.. هو عايز واحدة أضعف وأقل فى كل حاجة.

فكرة بقى هتفضلى لوحدك دى كلها نصيب حبيبتى.

اوعى تتجوزى حد إلا لو كان بيموت ف شغفك وحماسك).

لو حتغيرى حاجة علشان حسيتى انها مش لطيفة مع الناس، ماشى، إنما مش علشان تعحبى حد. التغير الأول جاى من جواكى انتى وعلشان مقتنعة.وعشان انتى مقتنعة إن دا أفضل لحياتك الشخصية والعملية، إنما غير كده الشغف والحماس ده جميل. لو هتطورى حاجة فى شخصيتك يبقى عشان نفسك مش عشان تعجبى حد. أن يكون عندك شغف فدى حاجة عظيمة.

خليكى فخورة بيها.

عيوب أى شخص بتكون مميزات لشخص تانى.. وبرضو مميزات شخص ممكن تبقى عيوب لحد تانى.

اللى انتى فاكراه عيب فيكى أو حد صدر ليكى الفكرة دى عموما ممكن حد تانى يشوفها حيوية وروح مرحة وحلوة وطاقة وحماس وإيجابية.

بس طبيعى منعجبش كل الناس احنا برضو مش أى حد بيعجبنا ولازم صفات معينة، هما مش لينا ومش مناسبين لبعض هيجى حد يحب شخصيتك دى وكلك على بعضك كده ومش هيكون بيحب البنت الهاديه الكيوت.. كل واحد بيروح للى شبهه وعاجبه.

ممكن طبعا إن ناس كتير  بتحب البنت الهادية اللى صوتها ميطلعش وكده عشان ده بيديهم انطباع للطاعة والخنوع أو يمكن شكل من أشكال الأنوثة.. السؤال بقى.. هى دى عقلية الراجل اللى انتى عايزاه؟

القرار قرارك.