أنا عايز آكل محمر ومشمر!

هذه الحكايات، حكايات من وحى خيال الكاتب والرسام، وليست لها أى علاقة بالواقع الجميل، حكاية أب شايف المصلحة وعارفها وفاهمها.. ما هو كان جاى لما الباقى كان لسه هيروح! أومال إيه؟! 

غصب عنه، مش بخاطره، رافض يسيبهم يجربوا بحريتهم، خايف عليهم حتى من نفسهم، أما أولاده.. لأنهم لسه رايحين فمش فاهمين، عايزين يجربوا، عايزين يفكروا بنفسهم لنفسهم.. وهنا تبدأ الحكاية.

 

 

 

الأب: بقولك إيه يا حبيبتى.. هناكل إيه النهارده؟!

الأم: والله بفكر أعمل شوية مسقعة وفلفل مقلى إيه رأيك؟!

الأب: يا ساتر يا رب.. ليه؟! فين المحمر؟! فين المشمر؟!

الأم: هو إيه محمر ومشمر.. من إمتى؟!

الأب: إيه من إمتى دى؟! عادى مش من حقى أطلب المشمر والمحمر؟!

الأم: لأ حقك.. بس انت دايما بتقول الجودة بالموجودة وعامل فيها «الشيخ راضى عبدالراضى»!

الأب: وانت على طول عملالى فيها «السيد راضى» بخفة دمك المبالغ فيها دى!

 

 

 

الأم: والله عايز مشمر ومحمر.. هات من تحت البلاطة.

الأب: أنتى أصلا أخدتى البلاطة نفسها مش اللى تحتها بس.

الأم: يبقى المسقعة والفلفل المقلى.

الأب: استنى.. طيب ممكن تشرحيلى يعنى إيه المشمر؟!

الأم: المشمر بقى ده.. الأكل.. اللى لازم تشمر عشان تاكله.. اللى سايح فى السمنة البلدى.. ومتغرق باللحمة والملبس..

الأب: الله.. الله.. طيب عايزه كام عشان تطبخى المشمر ده؟!

الأم: مش كتير.. هات 800 جنيه.

الأم: يا نهارك مش فايت.. 800 جنيه عشان أكلة واحدة فى يوم واحد!

الأم: لأ.. ما احنا ممكن ناكل منه تانى بكره.. هات بقى.

الأب: طيب.. قوليلى هتعملى إيه؟!

الأم: هعملك فخدة ضانى على شوية رز بالمكسرات ومحشى ورق عنب وبطة متزغطة بيتى.. ودى أصلا عندى فى الفريزر عشان تبقى عارف 

 

 

كنت مستنية أطبخها لما بنتك تتخطب!

الأب: طيب خدى.. جريتى ريقى.. 600 جنيه أهم.

الأم: حبيبى ما تطلعش عينى.. هات الـ200 جنيه.

الأب: بعدين والله هديهملك.

الأم: عارف بقى عليك كام؟! أكتر من 15 ألف جنيه بالطريقة دى!

الأب: يا ساتر أنت حاسباهم من أول يوم جواز!

الأم: مش تتكسف إنك بتعمل كده من أول يوم جواز؟!

الأب: يلا طيب والنبى أنا جعان أوى النهاردة.

الأم: حاضر.. هات عشرة جنيه.

الأب: اشمعنى!

الأم: هجيب نعناع عشان نشرب شاى بالنعناع بعد الأكل.

الأب: طيب خلاص يعنى يبقى عليا 15 ألف وعشرة.

الأم: لأ.. هات.

الأب: خدى.. يا ساتر!

الأم: هعملك المحمر والمشمر.. والمنعنع كمان.

الأب: خلينا ناكل فيه أسبوع ده بقى.

الأم: لله الأمر من قبل ومن بعد!