والدى الحبيب

علمتنى الحب لأنى اتولدت على حبك أنت وأمى، مكنتوش بتفارقو بعض، علمتنا نرتبط ببعض.
 
علمتنى الجدعنة لأنك كنت جدع مع الناس، علمتنى أن بيتى يبقى مفتوحاً لأن بيتك مفتوح لكل الناس تعبت كتير فى حياتك، اتظلمت كتير، بس رغم كل الظروف اللى كنت فيها كنت بتعدى كل الصعاب.. كنت كل رمضان مابتنامش وتتعب وضغطك يعلى ونروح المستشفى عشان خاطر أنك مؤمن برسالتك وتوصيلها من خلال فنك والتليفزيون. . كان عندك على طول طموح وتجديد للحياة.. علمتنى حب الفن، شربتنى الفن وحب الاستديوهات، اتعلمت منك كتير، قربتنى منك وكنت معاك فى كل تصويرك وكل النجوم والمشاهير حواليك، بس رغم كل اللى شفته من صعاب فى الوسط الفنى ربتنى صح و سيبتنى أشق طريقى وأنت شايفنى من بعيد وكنت كل ما أفشل ألاقيك بتزقنى وتدفعنى للخطوة اللى بعدها.. كنت صاحبى وقريب منى ولما أصحى الصبح لازم أصحى على صوتك وقبل ما أنام لازم أسمع صوتك.. بعد فراق شريكة عمرك أمى لقيتك رافض الحياة، بس كنت بحاول أحط فيك الأمل.. وأقولك يالا يا فنان ورينا إبداعك يالا نعمل برامج ونكسر بيها الدنيا، أنت لسه نجم وبلاش إحباط بس كنت مصمم عالاعتزال.. استسلمت للمرض وقلت مفيش أمل ومفيش حياة بعدك يا سميحة. استحملت ألم وأنا كنت جنبك ومسبتكش لحظة عشان أنت السند الوحيد اللى هارجعله. . رمسيس الفنان كان حبيب كل الناس، رمضان هو يعنى يا تليفزيون يا.. إزاى هايجى رمضان وأنت مش موجود فيه.. كنا بنفكر مع بعض أنا وهو فى أفكار لبرامج كتير لكل رمضان لكن للأسف الإحباط والفشل كان بيكبر أكتر و أكتر.. تركتنى يا فنان للحياة بس جوايا حبك اللى علمتهولى بحب الناس والصدق والإخلاص اللى جواك ومساعدة أى حد محتاج حاجة.. بيتك كان مفتوح على طول وأوعدك أن عمره ماهيتقفل أبدا.
 
هاتوحشنى وعمرى ماهانسى ضحتك ونكتك وتعليقاتك.. ربنا اختارلك يومك اللى يصادف قبل يوم عيد ميلادك بيوم عشان العزا يكون الناس بتحتفل بيك معانا وأنت فى السما.. هاتوحشنى...
 
بنتك اللى مت فى حضنها ماريان