يوميات مدير مالك رايحة جاية كده.. عاوزة حاجة ؟!

 ما بترديش ليه ؟
- إحنا متخاصمين
 خلاص، أنا قررت أننا نتصالح
- يا سلام، مش قلت مش هنتصالح أبدا!!
 رجعت فى كلامى
- إيه إللى كل شوية تقرر وبعدين ترجع فى كلامك
 دى خطة جديدة فى اتخاذ القرار
- نعم !! يعنى إيه الكلام ده.
 مش  صحابك إللى خاصمتينى عشانهم بيعملوا كده !! مش مستشارة الرئيس قالت الكلام ده ، أنا حأعمل زيهم عشان أعجبك
- شفت.. أديك بتتريق أهو
 أعمل لك إيه ، حاولت أصالحك كتير وأننى رفضت قلت أهزر.. يمكن
- أنا حأوافق نتصالح بس عشان نتيجة الاستفتاء طلعت نعم..  لكن لو كانت طلعت لأ ، ماكنتش حاسمحك أبدا..
 لا ياشيخة.. أنا بقى لو باعمل زيك ماكنتش صالحتك عشان  ركبتى دماغك وقلتى آه وضيعتى البلدى..
 أنت مش ناوى على صلح بقى !
- لأ ناوى.. تعالى قوللى أنا ملاحظ أن الولد والبنت مش طبيعيين ، مالهم يا ترى ، أنت عارفة حاجة.
- آه.. مقهورين يا حبايبى.. الاتنين.
 ليه !! حصل إيه.. طمنينى
- خسروا اصحابهم
 يا خبر!!
- شوف يا سيدى البنت زعلت من صاحبتها عشان حطت صورة  البروفايل بتاعتها حازم أبو إسماعيل.
 يعنى إيه !! مش فاهم حاجة
- فى الفيس بوك ، لما صاحبتها حطت الصورة بنتك بتهزر معاها قالت لها أخوانجى بنى له بيت سلفنجى سكن له فيه ،  اتخانقوا والبنت قالت إن كثير من أصحابها اتغيروا ، وكل يوم.. تخسر واحدة..
 يا شيخة ده لعب عيال.. بكره يتصالحوا
- كنت بأقول زيك كده لغاية ما لقيت الولد كمان حصل معاه نفس الشىء.
 إيه حط صورة مين المرة دى.
- مش هو ، ده أصحابه إللى متعاطفين مع الإخوان قالوا له أنت ليه ضد ربنا والإسلام ، الولد كان حيتجنن وقرر يقاطع كل أصحابه الإخوان والسلفيين
 يا خبر.. إحنا وصلنا للدرجة دى
- وأكثر.. طب عارف جارنا ناظر المدرسة
 ماله راخر ؟
- مش كان حيطلق مراته.
 إيه !! فى السن ده !! ليه.. دى ست كبيرة ومش بتعرف تستعمل الكمبيوتر أصلا..
- شوف يا سيدى ، كانت بتتفرج على برنامج باسم يوسف هو شاف كده شاط، يقول لها البرنامج ده حرام  وإللى يتفرج عليه كافر.
 يا ساتر يا رب.. ووصلت للتكفير.. دى حتى ست سكرة وبتصوم اتنين وخميس وبتعامل كل الناس كويس، إزاى يقول كده وهو ناظر ومسئول عن طلبة..
 
- تقول إيه بقى ، أصل فيه فتوى طلعت أن البرنامج حرام عشان بيتريق على الشيوخ.
 أنا صراحة شفته لقيته بيجيب الشيوخ أو إللى بتسميهم شيوخ دول وهم بيتكلموا والناس تضحك على كلامهم.
 وهو  ده يصح برضه ؟
- وباسم يوسف ماله ، المفروض هم إللى يخلوا بالهم من كلامهم المهم حصل إيه مع جارنا.
- زى ما بتقول كده الست سكرة قالت بلاها البرنامج ، بس طول الوقت يتخانقوا.. زينا كده
 إحنا اتصالحنا خلاص
- آه.. الحمد لله. ده فيه أخوات خسروا بعض خالص واحدة فى برنامج فى التليفزيون قالت كده.
 قالت إيه ؟!
- قالت إن أختها فى جماعة الإخوان ، وكانوا بينزلوا مع بعض الميداين أيام الثورة ، دلوقتى أختها مش طايقاهم وبتقول عليهم برضه أنهم ضد الإسلام ومش عاوزين شرع الله.. اتخاصموا.
 بجد.. تصدقى أنا حصل معايا حاجة زى دى.
-  إيه.. مين.. أخوك !!
 لأ.. الحمد لله.. واحد صاحبى فى الشغل.. إحنا كنا كويسين قوى مع بعض. لغاية قريب كده. كل ما تكلم فى أحوال البلد، يفضل يدافع عن الإخوان ويقول هيحصل نهضة وأنا أتريقت وقلت له إن النهضة طلعت فنكوش.
 عادتك ولا حتشتريها.
- اسمعى بس ، أنا أخذت الحكاية عادى وبعدين لقيته بطل يجى يتكلم معايا ، قلت يمكن مشغول ، مرة كانت معايا العربية وأنا مروح قلت له تعالى أوصلك. رفض.. وبعدين قال لى مش هأعرفك لغاية ما ترجع لربنا.. اتخضيت وقلت له براحتك.
- آه.. الحكاية دى بتحصل كثير دلوقت
 أنا بس ما كنتش واخد بالى فعلا إن الموضوع ده بيتكرر كتير كده.
- المصريين انقسموا ، ناس مع الإسلاميين ، وناس ضدهم
 يادى المصيبة ، أنتى اتجننتى ، مين دول إللى مش إسلاميين ، أنا ضد الإسلام والإسلاميين !! مش تخلى بالك من كلامك.
- يا أخى مش قصدى ، أنا فاهمة ، بس إحنا اتعودنا نقول كده
 غلط.. لازم نتعود نبطل.. شوية شوية الكلمة هتلزق فينا. وهو ده إللى هم عاوزينه.
 هم مين ؟!
- إللى بتقولى عليهم ، إللى مسمين نفسهم إسلاميين
 طب يعنى أقول عليهم إيه ؟!
- قولى المتأسلمين..
 شفت.. بقيت زيهم.. متأسلمين يعنى إيه ؟! يعنى برضه كأنك بتقول عليهم ضد الإسلام و..
 بس ، بس..  نفكر فى اسم غير إسلاميين ده
- واحدة زميلتى فى الشغل قالت لى أنهم اتفقوا مع بعض - هى وأصحابها يعنى - أنهم يسموهم اليمين المتطرف بتقول كل إللى على تويتر والفيس بوك وكتاب كتير قالوا كده..
 هى حلوة بصراحة..
- بس حتبقى صعبة فى الكلام.
 آه تخيلى أنا وأنتى نقلد نتكلم ونقول اليمين المتطرف راح ، اليمين المتطرف جه ، بس عجبتنى قوى ، من هنا ورايح مش حأناديكى غير يا يمين يا متطرف.
 كده.. بقى أنا خفت نبقى زى إللى بيتخانقوا وقلت ماشى نتصالح ، وأنت تشتمنى !!
 هى فين الشتيمة دى ؟
- أنا يمين متطرف !! أنا ؟!
 مش صحابك ، حتتخلى عنهم من أول أزمة.
- كانوا أصحابى، ورجعت فى كلامى.
 انتى كمان.
- أنا فعلاً فى الأول قلت نمشى وراهم كنت فاكراهم بتوع ربنا، طلعوا يمين متطرف.
 ياسلام عليكى وانتى رايقة.
- آه بجد، أكتر حاجة مزعلانى منهم طريقتهم فى الكلام.
 قصدك إيه؟
- الواحد من دول لما يتكلم بأحس إنه متعالى على الناس وإنه محتكر لنفسه الصح وعمره ما يغلط، يقوم الشخص اللى بيتكلم معاه يعمل زيه، ويمسكوا فى بعض.
 حاجة تزعل صحيح.. المصريين بقوا منقسمين ومش طايقين بعض، ليه كده؟!
-  هو يعنى.. من غير زعل.. عادى أن الناس تختلف مع بعض.
 طبعاً عادى.. دى طبيعة البشر، لكن اللى مش عادى إن الخلاف يبقى عنيف كده، والواحد يشوف اللى مختلف معاه غلط على طول.
-  أنا مش كده.
 النهاردة أنتى فعلاً متغيرة، بس الفترة اللى فاتت كنتى فظيعة.. من غير زغل.
- وأنت كمان.. لازم تعترف إن إحنا الاتنين عملنا أخطاء.
- بس إنتى..
- مافيش بس.. إنت لسه قايل الكلام ده.
 ماشى ياست، عشان خاطرك.
- أعمل لك شاى.
 اعملى، أصل فيه برنامج فى التليفزيون مهم عاوز اتفرج عليه.
- لأ.. إحنا نتفرج على فيلم أحسن.
  ليه إنشاء الله، بأقولك برنامج مهم، حيناقشوا المواد اللى مفروض مجلس النواب يعدلها فى الدستور اللى الشعب وأنت وافقتوا عليه
- ما هو عشان كده بأقول الفيلم أحسن.. بدل ما نتخانق تانى.
 اسمعى وشوفى، يمكن تقتنعى.
- اقتنع بإيه، ماتستنوا تشوفوا حيحصل إيه.. مش يمكن حال البلد ينصلح.
 ادينى إمارة واحدة تقول كده.
- أهو أنت دلوقتى اللى عاوز خناق.
 مش خناق، أنا بأقول نسمع.
- وآخرتها معاك!!
 أعملى شاى، حاجيب الفيلم.
- مش ده، عاوز فيلم أجنبى.
 سكى عالشاى، أنا قايم أنام.
- أحسن برضه.. تصبح على خير