رسالة من الراجل اللى فحت الكنال

بقلم: عبدالرحمن الأبنودى

أبنود - قنا

1938 - 2015


عينى عليكى يا أم يا طيبة
قلبى معاكى من بعيد يا حبيبة
رغم الوجع فى قلبى.. حاسس ضحكتك
ومن بعيد..
شايفك بتتولدى جديدة من جديد
وبحسدك
يا شقا الألوف اللى الضنا غيبها
لاجل ميتك تمشى تغنى وتنحنى على ضفتك
بكلمك يا اما أنا ميتك
اللى مشى م البحر ده للبحر ده
محنى عليكى بيفحتك
لا الدمعة تنزل من عنيا فى الهجير
ولا م الأسى كان فيا ضحكة تنضحك
جيوش من الشياطين صعايدة وفلاحين
متسلحين بالكواريك وبالفيسان
لكنهم متقيدين فى دفاتر السلطة وعيون المخبرين
وعرقنا ينزل فى لسنتنا
طعمه طعم ميتك
حتى الغنا لما نغنى نحس أن أحنا هناك ومقربين
نشف يا أمى فى لسنتنا
زى ما الليل كان يضيع الأنين
الجلادين المجرمين قلعونا من أراضينا وبيوتنا
بيقتلنا الحنين
بصى معاى أهى لسه رجليا فيها طين
مع إنى ميت من سنين ومن سنين
ما عرفت مت ساعتها لحساب مين
لا قالولنا حاجة عن الوطن
غير الخواجة اللى رطن
وضرب بكرباجه يا أمى شمال يمين
بكلمك.. أنا حبيبك أنا شهيدك
ميتك اللى فتح باب الطريق لميتك
الميه دى.. دمى أنا
لف الزمن لفات طوال
وما عادش إنسانك يا مصر
يعدى عالدنيا دى وكأنه خيال
وأتغير الكون يا الكنال
وبتفحتولى شقيقة تانية
بعرق وجهد وجدعنة مصر الرجال
نفس الرجال.. لكن لا سخرة وكرابيج ولا حبال
ولا رب أسرة متشفوش تانى العيال
ولا أجنبى يشتم كأنه فى بيت أبوه
ما عرفنا يومها منين جابوه
لكنى شايفكوا النهارده بتفحتوا متبسمين
وكأنى عارف ده ابن مين وده ابن مين وده ابن مين
وده جاى منين وده جاى منين
أبطال مصاحبين النضال وبتجلدوا ضهر الرمال
مش ضهرنا اللى هروه زمان الجلادين
ولا مقاطف على الكتاف لا م التقال ولا م الخفاف
ولا عرق يعجن وشوشنا بالرمال
قال بس من شافنا يخاف
تانى بتفحتوا الكنال تانى بتخلقوا ضفاف
من غير كتافيكم ما تنقل الرديم
فتعملوا عمل عظيم
من غير عباد بتندفن بالألوفات
بتفحتوا تانى كنال بالجرارات والحفارات والكراكات
رجال تشيل بحر الرمال