تعاويذ الخوف

تعاويذ الخوف
المتعلقة فـ حجاب على صدرك
مش قادرة تسد الصوت
اللي بيزعق فيك ويصحيك
من عز منامك
لساك مش قادر تتخلص منه
اكمنه بيهز إيمانك
ويزلزل جواك
إحساس الولد الطيب بالأشياء
بالحواديت اللي اتعودت سماعها
من جدك منعم
عن بطل الحرب السيد حمدى القوصى
بالحلم اللي بتحفى وراه
شعاع مطلوق ورا سرب حمام
مهما تعاندك الأيام
بالعربية الهامر
اللي عينيك أول ما تشوفها
بتوسع وسع الدنيا
وفـ ثانية
بتقفل على فقرك بالضبة وبالمفتاح
بالجو ربيع والدنيا براح
بالبنت اللي بتحلم تلمس إيدها
على كوبري قصر النيل
بالخيل اللي بيجري جواك
زي الرهوان
مع إنه متسلسل
بقيود الصبر وتوب الحرمان.