لا تتزوج «حنجورية»

 هتدوقك بس مش هتشبعك.. هتشربك بس مش هترويك.. هتديك بس هتاخد منك أضعاف اللى أخدته.. دية باختصار «الحنجورية»..

ابعد عنها وغنيها.. «الشيطان يكمن فى التفاصيل»، بيتك هيبقى جهنم الحمراء.. مش هتشوف راحة.. طول الوقت هتبقى فى جدال وشد عصبى وتهديدات وعنف وبلاوى سودا.. الحنجورية مش هتشوفك أصلا- لأنها مش بتشوف غير نفسها وشغلها- ومهما عملت هتفضل فى عينها مقصر- أيوة مهما عملت- وعليه عمايلك زى عدمها.
 اتجوز أى حاجة إلا الحنجورية.. ممكن تتواءم مع أى سيدة أخرى إلا «الحنجورية» لأنك دائما هاتبقى «على الرف» طول اليوم.. يعنى ببساطة ها تبقى درجة تانية فى اهتماماتها مهما حاولت تظهر عكس كده.. انظر حولك ستجد عشرات الحالات للطلاق الفعلى والانفصال النفسى تزداد يومًا تلو الآخر جراء الارتباط  بحنجوريات.. مش ممكن أشوف حد رايح للنار برجيله وما أنصحوش إنه يلقى بنفسه للتهلكة.. الزواج من حنجورية يعنى إنك بتحكم على نفسك بالإعدام فى كل يوم لأسباب كثيرة منها:
- الحنجورية جريئه جدا ويندب فى عينها رصاصة يعنى بجحة جدا ومش هاقول أكثر من ذلك.
- المرمطة اللى اتمرمطتها فى حياتها خليتها «بيئة» فعادى جدا إنك تلاقى صوتها تخين أو تردحلك فى الشارع، والأدهى إنها ممكن ترجعلك هدومها متقطعة من خناقة !
-  عادى جدا إنها تكون معاك ويجيلها تليفون تقولك ثوانى بس والثوانى تقلب ساعات.. وإنت «كيس طرشى» جنبها.
- مفيش مشكلة إنها ترجع متأخر من «الشغل» ومش من حقك تنطق عشان الهانم بتجيب فلوس، وطبعا العيال يروحوا فى داهية.
- الحنجورية بتكون غلباوية وبتقاوح فى كل حاجة، لأنها عندها إحساس بالذات غير طبيعى باعتبارها «أستاذة» وكدهون وعشان كده صعب تقنعها بحاجة وأحسن حاجة إنك «تجيبها قفش كده».
- لبسها غالبا بيكون «ضيق زمارة» بحكم الشغل يعنى بناطيل وباديهات فى الصيف وزفت ضيق وسكينى فى الشتاء وبحكم المرمطة السابقة تلاقيها بتطلع تقعد مكان «الكمبيوترات» فى الشغل وتدلدل رجلها كأنها قاعدة فى النادى.
- هاتلاقيها عارفة رجالة بعدد شعر راسك وهاتقولك معلش دول زمايلى و«كركر ومرمر» على الفيس بوك ولو نطقت هاتقول انتا مش واثق فيا يا BABY
- عشان السبب اللى فات هاتلاقيها اتحبت بتاع عشرميت مرة واتخطبت عشرميت مرة يعنى مشاعرها اتحرقت يا باشا من كتر بحبك والكلام ده وما بقتش تتأثر.
- الحنجورية شكاكة موت، مهما حاولت تظهر عكس كده، وعشان كده هاتكون متراقب 24 ساعة وهاتسألك أسئلة بنفس المعنى وإنت زى الجردل هاترد ردود مختلفة وهاتكشفك.
- الحنجورية مغرورة وعندها إحساس بالذات قوى،  وعشان كده صعب قوى إنها تقولك كلمة حلوة إلا لو إنت اللى بدأت إلا من رحم ربى،  وبتعشق نظرات الإعجاب وكلمات الإطراء من المحيطين.
- مود الحنجورية غالبا بيكون سيئ ولأنها مش بتعرف تفصل بين شغلها وبيتها يبقى هاتشوف أيام سودا، يعنى لو راجعة من مشكلة فى الشغل ولا حاجة هينعكس على سيادتك فى البيت مش هاتلاقى أكل.
- الحنجورية دائما عندها تطلعات مادية خصوصًا لو «بتقبض كتير»، ومهما عملت مش هاتقدر تملأ عينها.
- الحنجورية لن تكون أمينة على أسرارك لأنها «بتلك كتير» و«رغاية موت» يعنى أسراركم الخاصة هاتتشير على الانبوكسات بتاعة كل زميلاتها- مش عاوز أقول زملاءها-
- الحنجورية تفقد جزءا كبيرا من أنوثتها بحكم الشغل، يعنى انسى تسمع كلمة «حبيبى» اللى بتحلم تسمعها، ولا أنها تتدلع ولا تتمايص عليك «ده ممكن مرة كل 15 يوم مثلًا لو أخدت مكافأة من الشغل».
-  بعض الحنجوريات «عذرا» من كتر الشغل لا يهتمون بالنظافة الشخصية بالشكل الكافى فتلاقيك بتعرف انها جت البيت من رائحة «الهبو» اللى داخلة عليك
- معظم الحنجوريات مش بيعرفوا يعملوا حاجتين مع بعض، وعليه هاتيجى على بيتها فى الغالب وهاتبدى الشغل على حضرتك ورئيسها فى الشغل هايكون هو عينها وعافيتها مش سيادتك
- السفر.. ساعات شغلها بيطلب منها السفر، وعليه ياكش يولع البيت على العيال على حضرتك شخصيًا، المهم إنها تسافر وتهيص وأنت تقعد «لايص بالعيال»..
 يتبع العدد المقبل