كفاحى المضروب

ما أعرفش إيه الوضع دلوقتى،
بس خلال الفترة من 2005 لـ حد 2011
كان الناشرين والموزعين المصريين الصغيرين
عايشين على شوية كُتب
هى الأكثر توزيعًا
من بينها كتاب «كفاحى» بتاع أدولف هتلر.
الظاهرة دى كانت غريبة جدّا علىّ،
مكنتش فاهمها خالص،
ولـ حد دلوقتى مش قادر أفهمها،
ليه المصريين مقبلين على الكتاب دا تحديدًا،
بس العجب يزيد
لما تعرف شوية عن تاريخ الكتاب،
اللى اتنشر من 92 سنة.
ناس كتير
فاكرة إن دا مذكرات هتلر فى أواخر حياته،
إنما الواقع
إن هتلر كتب الكتاب دا
خلال فترة سجنه،
بعد ما كان بـ يدبر لـ انقلاب على الحكومة،
الانقلاب فشل،
اتنشر سنة 1925،
قبل ما هتلر يمسك الحُكم بـ سنين طويلة.
بـ التالى،
الكتاب مفيهوش أى حاجة عن حُكم هتلر،
ولا أى حاجة
تخص الحرب العالمية التانية،
ولما حاولت أقرا نسخة من الكتاب
لقيت صعوبة شديدة،
نتيجة استغراقه فى الشأن الألمانى
بعد الحرب العالمية الأولى،
وأنا يعنى مش دايس أوى،
فـ فيه حاجات كتيرة مكنتش فاهمها،
إضافة إلى إنه مش مذكرات بـ المعنى المفهوم،
لـ إنه بـ يستخدم المذكرات لـ شرح أفكاره،
اللى محتاجة شغل كتير لـ استيعابها،
نتيجة بُعد السياق عننا تمامًا.
فـ إيه بقى اللى يخلى المصريين يقبلوا على كتاب زى دا.
اللى اكتشفته
كان حاجة لطيفة جدّا،
هى إنه تقريبًا ولا كتاب من اللى بـ تشوفهم على الرصيف،
ومكتوب عليه كفاحى،
هو فعلاً كتاب «كفاحى»
الأغلب إن الكتاب (اللى ع الرصيف)
بـ يبقى فيه فصل ولا حاجة من الكتاب (بتاع هتلر)،
الباقى كلام شعبى عن هتلر
أو منسوب لـ هتلر
خصوصًا علاقته ورأيه فى اليهود.
نُسَخ كتيرة
من اللى الكتب اللى بـ تتباع بـ اسم «كفاحى»،
هى فى حقيقتها
مجرد كلام جَمعه مؤلفين مجهولين
ما كتبوش اسمهم،
بـ يخاطبوا النزعات الشعبية عند القراء،
ويفرّغوا رغبة دينية
فى الهجوم على أتباع ديانة تانية،
من الطبعات دى
ظهرت مقولات كتيرة اتنسبت لـ هتلر،
ولما ظهر الفيسبوك
تحوّلت إلى كوميكس
وأقوال الناس عايزين يقولوها،
بس تحت اسم «هتلر».
مِسكين هتلر.•

نادرة الـ «مش شامية»


بص هو فعلاً من حق أى حد
ينخدع فى شكلها وستايلها
والطريقة اللى ظهرت بيها
وتفاصيل كتير فى حياتها الفنية (أهمها أم كلثوم)
فـ يعتقد إنها من الشام
وفيه ناس كتير كمان
بـ يسموها «نادرة الشامية»
إنما يعنى لما تدور شوية صغيرين
تعرف إنها من عابدين يا فضائيين
«مصطفى أمين الشتاوى» دا اسم أبوها كان عايش فى عابدين
وسط أسرة جاية من البحيرة
بس هو مكنش طوع الأسرة
راح اتجوز واحدة أصولها لبنانية
على غير رغبتهم
وخلّفوا بنت اسمها نادرة
اتولدت 17 يوليو 1906
فيه حاجة حصلت بعد ميلاد البنت
حاجة غامضة تضاربت فيها الأقوال
بس نتيجتها إن البنت الرضيعة بقت فجأة من غير أب ولا أم
المؤكد إن الأم ماتت والأب هاجر
والطفلة اتربت مع عيلة أبوها فى عابدين لكنها كانت عبء عليهم
هم تحمّلوها بـ اعتبارها «لحمهم»
إنما كانوا مستنيين بس إنها «تبلغ»
مجرد ما وصلت 13 سنة
جوزوها لـ أول عابر سبيل
ما استحملتش معاه ست شهور
وهربت هربت منه ومنهم ومن الكل كليلة فـ طلقها طبعًا هى اتعلقت بـ الطرب اتعلمت تغنى وتلعب عود وتلحن السميعة ومحبى الأغانى القديمة يعرفوها كويس
وغالبًا غالبًا بـ يحبوها مطربة وملحنة
ما كملتش عشرين سنة
وكانت احترفت وبدأت تغنى
غنت على مسرح رمسيس
أول ما بدأت السينما غنت ومَثّلت فيها
يعنى هى بطلة فيلم «أنشودة الفؤاد»
اللى فيه خلاف
إذا كان أول أو تانى فيلم مصرى
نجحت نادرة
بس اتعرفت فى الوسط الفنى
بـ اسم «البت الشامية»
الاسم دا طلّعته عليها أم كلثوم
ومكنتش تذكر اسمها نهائيّا
طول التلاتينات والأربعينات
كانت نادرة نجمة معروفة
ومن مطربات الصف الأول فى الإذاعة
وملحنة معتمدة فيها
ولما كانت تغنى ع المسرح
كانت تقود التخت وتعزف هى العود وكانت محل اهتمام ورعاية شوقى بيه لكن بعد 1952 ظهر جيل جديد ومش كتير اللى صمدوا من مطربى ومطربات التلاتينات والأربعينات
جيل كامل اتدشت فتحية أحمد، عباس البليدى، إبراهيم حمودة وهى وغيرها غيرهم كانوا ملء السمع والبصر أو السمع بس ثم اختفوا ومحدش بقى يتابع شغلهم ولما شغلهم وقف ما بقوش يتابعوهم هم شخصيّا ولما كان الواحد منهم يموت كان يبقى محظوظ
لو اتنشر عنه خبر 100 كلمة
عنوانه «وفاة الفنانة نادرة»
ربنا يرحمها بقى
ويرحم الجميع.•

الكنال


لما نابليون جِه مصر
كان معاه ناس مهمين آخر حاجة
لعبوا أدوار كتيرة فى تاريخ مصر
حتى بعد ما الفرنسيين سابوا مصر 1801
يعنى تقدر تقول
إنهم ما مشيوش بعد التلات سنين اللى قعدوهم
جايز ما بقاش فيه وجود عسكرى
إنما وجودهم كان له أشكال كتير
مثلاً
كان معاه دبلوماسى اسمه ماثيو
ماثيو دا
قدر يعمل علاقات كويسة مع رجال الأزهر
ومع قادة عسكريين
ومع أى حد له كلمة مسموعة فى مصر
لما نابليون مشى
ماثيو ما مشيش فورًا
قعد شويتين
خلالهم استشف إن فيه قائد عسكرى مؤكد هـ يبقى له شأن كبير فى المرحلة الجاية
اسمه محمد على
فـ قرب منه واتصاحبوا
بـ حيث لما بقى صاحبنا والى مصر
كان ماثيو من المهمين عنده
بعد شوية ماثيو هـ يسيب مصر
ويسيب فيها ابنه فرديناند
فرديناند ديليسبس
الراجل اللى هـ يعتمد عليه السيمونيين
فى إنه ياخد الموافقة على حفر قناة السويس
مين السيمونيين؟
دى جماعة كان ليها دور فى حركة السياسة العالمية
ماهيش حاجة سرّية ولا نظام ماسونية وكدا
أساسًا العالم كله
كان فيه جماعات شبيهة
تساعد على الاشتعال ولا تشتعل
دورها يتخطى الأحداث الآنية
لـ التفكير فى اللى جى
إنفانت
واحد من السيمونيين اللى اشتغلوا على مشروع قناة السويس
كَتب:
علينا أن نجعل مصر،
هذه العجوز الشمطاء،
طريقًا يصل أوروبا بالهند والصين،
فمعنى هذا
أننا نضع إحدى قدمينا على نهر النيل،
والأخرى فى بيت المقدس،
وتصل يدنا اليُمنى إلى مكة،
وتلمس باليد الأخرى روما،
مُتكئة فوق باريس،
اعلم يا صديقى
أن السويس هى مركز حياتنا وكفاحنا،
ففى السويس
سنُحقق مشروعًا طالما انتظره العالم،
ويُبَرهن على أننا رجال
ديليسبس حاول مع محمد على
ومحمد على رفض قولاً واحدًا
قال له:
مش عايز بسفور فى مصر
البسفور دا مَضيق فى تركيا
مجرَى ملاحى مهم جدّا
فـ بـ سببه فيه نزاعات دولية
وتدخلات من الدول الكبرى
فـ إذا كان الباب العالى عنده كدا
فى مصر هـ يحصل إيه؟
فرديناند ما يأسش
بعد محمد على حاول مع ولاده
لـ حد ما خد الموافقة من سعيد
وبدأت أعمال الحَفر يوم 16 يوليو 1856
بس يا سيدى
وعنها.•