شيخ رفعت

أول صوت نقلته الإذاعة المصرية لـ البشر
سنة 34 كان صوت أحمد سالم وهو بـ يقول:
«هنا القاهرة»
التعبير اللى كان من اختراعه
واستمر لـ حد دلوقتى
سالم كان بـ يقدم البرامج
أول برنامج طبعًا كان القرآن
مين أول صوت قال أى حاجة فى الراديو؟
اللى قرا يوميها كان الشيخ محمد رفعت
السنة اللى فاتت
بنتى سألتنى نعمل إيه فى رمضان؟
بعد الصيام والذى منه قعدتها جنبى
وعملت بلاى ليست من كام حاجة
أغانى رمضان
على صوت النقشبندى
على قراية الشيخ محمد رفعت
وقلت لها هو دا رمضان بتاعى
قالت لي: رمضان دا حلو
رفعت خلى رمضان حلو
علشان كان عنده السر
اللى هو حل الأزمة السرمدية فى التلاوة
إزاى تقدر تقرا بـ طبقات عالية
فى نفس الوقت تبقى خفيضة
مش عارف إذا المشكلة دى واضحة
بس خلينى أفكرك بـ حتة كدا
من غنوة قول لى حاجة
بتاعة عبد الحليم حافظ
لما بـ يغنى:
قول يا .....
قلبي
قول يا .....
أملى
بـ يتنقل فيها من الجواب
فى «قول يا ....»
لـ القرار فى «قلبى»
يجوز بقى يعجبك حليم لا قدر الله
ويجوز تبقى زيي
إنما شوف هو فاصل بينهم إزاى
عشان دى حاجة ودى حاجة
رفعت بقى
ما تعرفش هو بـ يقرا من الجواب ولا القرار
يعنى مثلا
لما يقرا فى الرعد:
«له معقبات من بين يديه ومن خلفه
يحفظونه من أمر الله»
«من أمر الله» دى
اللى بـ يقراها بـ همزة وصل
حسب قراءة ورش عن نافع
«من أمر الله» دى
جواب ولا قرار؟
عيش يا معلم
طبعا هو غير طبيعى عموما
بس الموضوع دا فعلا معجزة
محمد رفعت أبوه مأمور قسم الخليفة
وكانوا ساكنين فى درب الأغوات
فـ هو من عيلة ميسورة
أبوه مات وهو صغير
فـ اشتغل هو مقرئ
وكان أشهر مقرئ فى بر مصر
الشيخ كان عقده فى الإذاعة 3 جنيهات فى الشهر
صحيح هو يستاهل 30، 300
إنما 3 جنيهات دول كانوا ثروة
غير إنه كان بـ يحيى ليالى
والدنيا كانت بسيطة
فـ المزاج كان رايق وعال وفلة شمعة منورة
مشكلة رفعت
إنه مكنش يخطى خطوة
من غير ما ياخد فتاوى مغلظة
فتوى إنه يقرا فى الإذاعة
فتوى إنه يسجل القرآن
فتوى إنه يسجل القرآن لـ البى بى سي
(عشان مش مسلمين)
فـ دا أخره كتير
وخلانا نفقد فرصة
إنه يبقى عندنا القرآن كامل بـ صوته
المحزن
إن حياة رفعت تنتهى
9 مايو 1950
نتيجة سرطان الحنجرة
بقى الحنجرة دى
ييجى لها سرطان؟
سبحان الله يا أخى
سبحان الله


جينى يا جينى

جينى فون ويستفالين
كام واحد يعرفك يا جينى؟
كام واحد اهتم بـ اسمك وطبيعتك؟
كام واحد
يعرف قد إيه كنتى جميلة ومثيرة
وفتاة أحلام الشباب فى بلدكم البعيدة
مع ذلك
فضلتى ابن الجيران
اللى كان أصغر منك بـ 4 سنين
يمكن اتأثرت بـ حب أبوكى وأخوكى له
بس المؤكد
إنك حبيتيه حبًا عظيمًا
استحملتى عشانه كل حاجة
لوم العواذل وأولهم عيلتك نفسها
استحملتى تخرجى من جنة الأرستقراطية
وتعيشى مع شاب نص مجنون
أبوه مات، فـ ضاع دخل أسرته
وهو نفسه
جرى ورا أحلام تغيير العالم
لـ درجة إنه مكنش بـ يغير هدومه
ولا حتى بـ يحلق دقنه
سنين
غربة، نفى،طرد
مشهد متكرر
من بروسيا لـ باريس لـ بروكسل
لـ لندن
جواز، سبع أولاد
كان بـ يحبك حب عنيف
كان بـ يكتب لك أشعار مؤثرة
كان بـ يحبك بـ إخلاص
ويخونك بـ إخلاص
بس إنتى وقفتى معاه
استحملتى
إن صديقه يصرف عليكم بـ الكامل
استحملتى مرضه
وقفتى معاه لـ حد النهاية
إنما اطمنى
هو حزن عليكى ومات بعدك على طول
بعد ما ساب لـ العالم فكرة
وآلية لـ التفكير
يمكن مفيش حد ساب فكرة مؤثرة
وطريقة تفكير مهيمنة
قد ما هو ساب
كارل ماركس
اللى الأسبوع دا
بـ يكمل وجوده ع الأرض
200 سنة
كارل ماركس حاجة تانية
وعلى رأى الحاجة إيمان مرسال
ماركس ماركس
لن أسامحه أبدا
 
كومبارس

كان فيه ممثل مش معروف
كومبارس صامت فى التليفزيون
معظم المشاهد اللى بـ يطلع فيها
بـ يكون فيه مكياج
أو مجاميع وهو مش باين
وكان ألدغ
الممثل دا كان بـ يقعد على قهوة
القهوجى كان بـ يناكفه
ويقول له
ممثل فى التليفزيون ازاى؟
وعمرنا ما شفنا وشك؟
لـ حد ما سماه
أستاذ فلان
(اللى عامل نفسه ممثل)
الحكاية دى كانت عاملاله أزمة
فـ مرة ادوله دور
فى مسلسل تاريخى
ملابس وحاجات وسيف ودقن وهلم
فـ راح واخد بعضه
وطلع من ماسبيرو زى ما هو كدا
ركب تاكسى
وقعد ع القهوة
يقول لـ القهوجى
تعالى يا تيت تيت تيت
شايف السيف؟
ممثل ولا مش ممثل
شايف الدقن؟
ممثل ولا مش ممثل؟
هـ يبدؤوا تصوير المشهد
هو حاجب الملك
فـ مش هـ ينفع تصوير من غيره
فين الزفت الكومبارس؟
هو كان سايب خبر مع العامل بـ مكانه
راحت عربية التليفزيون تجيبه
يا أستاذ فلان
البلاتوه واقف وإنت قاعد هنا؟
المخرج مش عارف يعمل المشهد من غيرك
فـ قال لـ مسئول الإنتاج
قول لـ البيه
قول لـ الأفندى (ع القهوجى)
بس
طبعا دا كان آخر دور ياخده
بس مش مهم
المهم
إن اسمه ع القهوة بقى
أستاذ فلان «الممثل».