الملك المؤسس

أول حاجة اشتغلها كان سواق
سواق عربية إسعاف
الكلام دا كان فى الحرب العالمية الأولي
وكان عمره 15 سنة
بس هو ضرب شهادة ميلاد
هم طنشوا عشان الحرب
خلصت الحرب، مشوه
فـ راح يشتغل أى حاجة،
بدأ كـ مندوب مبيعات وأشغال تانية
لـ حد ما اكتشف قدراته الموسيقية
نماها
بقى عازف بيانو
كل يوم بـ يكتشفوا شطارته
التحق بـ واحدة من الإذاعات المنتشرة فى شيكاجو
ثم لما وصل 30 سنة
ربنا كرمه ورفدوه
رجع راى كروك يا مولاى كما خلقتني
فـ اشتغل بقى فى مطعم يغسل صحون
ييجى بتاع خمس ست سنين
اتعرف على واحد اسمه برينس
اخترع مكنة لـ صب المشروبات العجيبة
الميلك تشيك والحاجات دي
فـ قدر يقنعه إنه هـ يسوق له المكنة دي
كانت وقتها اختراع رهيب
فعلا اشتغل راي
وباع مكن كتير
كسب منه أكتر مما كان يتخيل
عقبال ما قفل الخمسين
كان المكن بقى حاجة قديمة
والمطاعم ما بقيتش تشتري
فكر يتقاعد خلاص
بس لاحظ إن فيه 2 إخوات
عندهم مطعم افتتحوه يوم 15 مايو سنة 1940
عمالين يطلبوا منه مكن أكتر
الفضول خلاه يزور مطعمهم ويهتم بيه
لقاهم عاملين هامبورجر بس
والخدمة فيه هيلب يور سيلف
والوجبات سريعة التحضير سريعة الأكل
عرف إن الجوز دول أخدوا الفكرة من مطاعم فورد
عشان العمال ما ياخدوش وقت فى ساعة الغدا
فكر
إن حاجة زى دى هـ يشجعها رجال أعمال كتير
قال لـ الأخوين ماكدونالدز: ما تشاركوني
اقترح عليهم يوسع الحكاية
ما اقتنعوش
فضل يزن عليهم لـ حد ما اقتنعوا بـ نوع من الشراكة
هو مش حابه
بس رجله دخلت الليلة
بعد كام سنة من الخلافات
بين الأخوين ماكدونالدز وراي
قدر يزنق عليهم الدنيا
لـ حد ما خد حصتهم بـ 2 مليون دولار ويتحمل هو الضرايب
سنة 1955 بقى هو المالك الوحيد لـ المطعم
اللى بقى 200 مطعم فى ظرف كام سنة
عمل راى جامعة الهامبورجر
اللى بـ تدى درجة علمية رسمية
فى موضوع المطاعم ذات الوجبات السريعة
لما قفل الستين
بدأ يفكر يغزو العالم بـ الفكرة
لما وصل السبعين
كان راى احتل العالم فعلا
فـ شبه يتقاعد
يراقب إمبراطوريته اللى بـ تحكم الدنيا
بـ تحكمها فعلا
ومات بعد ما عدى التمانين
بعد ما ساب لـ العالم أقوى سلطة عرفها حتى تاريخه
السلطة اللى حولت قيود العبودية
لـ خيوط حرير
هى صحيح بـ تقيد برضه
صحيح لـ العبودية برضه
بس حرير
إيه رأيك فى النظام؟•

ترامادول


الترامادول بـ يؤدى غالبا لـ فشل كلوي
عشان كدا
الإنسان لازم يتجنب تعاطيه
إلا فى حالات الألم القصوي
الإصابة بـ سرطان العظام
حالات التعذيب الشديد فى أماكن التعذيب
أو وأنت خارج مع مراتك تشتروا لبس

مراكبى

كنت طير وصبحت مراكبي
الترجمة:
كنت سينجل
وبقيت رب أسرة
أنا بـ أقول بس الكلام دا
لـ اللى بـ يغنوا الحتة دي
وهم فاتحين بقهم ومبينين سنانهم
ومبسوطين
انبسطوا

عقدة المليجى

حابب أكلمكم عن عقدة المليجي
المليجى هنا مش محمود
المليجى هنا محمد
محمد المليجى واحد صاحبى إنت ما تعرفوش ولا أنا والله
هو مش صاحبى أصلا
هو شخص التقيته فى مناسبة ما
وقعدنا نتجاذب أطراف الحديث
فـ فى طرف من هذه الأطراف
قال لى عقدته اللى سميتها كدا
مش بس لـ أنها منسوبة ليه
إنما كمان لـ أنها متعلقة بـ اسمه
محمد
كل ما يقابل حد ويقول له اسمه
تسعة وتسعين فى المية هـ يقلش
ويقول نكتة خنيقة
عن تشابه اسمه مع محمود المليجي
سألته: وإنت مشكلتك إيه؟
قال لي طبعا بحب محمود المليجي
ومبسوط من التشابه دا
مشكلتي إن كل واحد بـ يقلش
كـ إنه هو اللى اكتشف الحكاية دي
كـ إنى خلال سنين عمرى الـ 35
ما قابلتش حد ذكى زيه
ولا نبيه زى اللى جابوه
خد باله إن محمد المليجى شبه محمود المليجي
هو لو كان ادى نفسه فرصة
ربع ثانية بس
كان خد باله
ومكنش خنق علي
سألته: برضه ما عرفتش
إيه اللى يخنقك فى كدا؟
أجاب لا فض فوه ومات حاسدوه
ما هو يا بيه
دا معناه إنه مش معتبرني
إنى بـ النسبة له هوا
إنى مجرد أداة عشان يقول إيفيهاته
فـ أنا أضحك
حتى لو الإيفيه حلو
المفروض يكون عارف كويس
إنه اتقال لى مليون مرة بـ مليون طريقة لـ حد ما زهقت منه
شبعت خلاص
شبعت
ومسك كتافى وقعد يهز فيها
وهو على صرخة واحدة
كفاية بقي
كفاية بقي
كفاية بقي
(تصفيق حاد)
لذلك أعزائى الرجال
اللى لسه داخلين على ارتباط جديد
أريد التنويه إلى أن: أنا حاسس إنك غير الستات اللى كلمتهم
إنتى مختلفة
أنا حاسس إن أرواحنا اتقابلت
هو أنا ليه حاسس إنك حزينة ووحيدة
صورك جميلة بسم الله ما شاء الله
وغيرها من هاتيك أولئك العبارات
مدة صلاحيتها انتهت
من خريف راس البر 1964
على رأى المقدس سميح
يا ريت ما تقولش جملة «عامة»
ما تقولش حاجة
ينفع تتقال من أى راجل لـ أى ست
اعمل حسابك
إن المواطنة اللى بـ تكلمها
سمعت وقرت من هذا الكلام
أكتر من اللى سمعه محمد المليجي
هو وكل إخواته
طول أعمارهم
وإنك مهما بلغت من التجويد
خلاص
الأكل بقى بايت وحمضان
التجديد يا أهل الله
التجديد لـ الله
طيب نجدد إزاي
إذا كان كل العبارات اتقالت؟
آه
دا بقى سر الصنعة
مطلوب منك شوية تعب واجتهاد
واطمن
لكل مجتهد نصيب
ولكل امرئ ما نوي
لكل شبر وحتة من بلدى حتة من كبدي
حتة من موال•

تقييم


س: إنت بـ تقيم اللاعب
بـ إمكانياته
ولا بـ مستواه اللى قدمه
ولا بـ دوره فى الفريق
ولا بـ إنجازاته
ولا بـ وفائه لـ ناديه ومنتخبه
ولا بـ أرقامه
ولا بـ أهميته حاليا
ولا بـ أخلاقه؟
ج: بـ مزاجي