درية

ما محمد فوزى اتقدم للإذاعة
اتقدمت معاه مطربة تانية
هى نجحت هو لأ
طبعًا هو نجح بعدين
وقصة عدم نجاحه الأول حكيتها قبل كدا
إنما المطربة التانية دى
كانت مين؟
دى كانت درية أحمد
(3 أبريل 2003 اتوفت)
درية بنت بدوية جت مصر
صوتها حلو
اتقبلت فى الإذاعة وغنت
ومن الإذاعة ع السيما
ومن الأدوار الصغيرة لـ الكبيرة لـ البطولة
بس كله فى اللى بيتنسى
ما عملتش حاجة من العلامات
مفيش يمكن غير غنوة
«علِى يا علِى يا بتاع الزيت»
اللى غنتها مع محسن حسنين
اتجوزتْ تاجر من بورسعيد
اسمه محمد عبدالسلام نوح
حملتْ منه
اتطلقتْ
اتجوزتْ المخرج السيد زيادة
البنت اللى خلفتها سَمتها سهير
السيد زيادة هو اللى ربَّى سهير
وكانت فاكرة إن اسمها سهير السيد زيادة
مش سهير محمد عبدالسلام
ولما راحت المدرسة
اتفاجئت إن اسمها كدا
درية قالت لها:
أصل السيد زيادة دا اسم الشهرة
لكنه فى الحكومة اسمه محمد عبدالسلام
لما وصلت سهير 13 سنة
درية أحمد اتطلقتْ من السيد زيادة
فـ رجعت لـ جوزها الأول
وقالت لـ بنتها الحقيقة
لكن الصدمة كانت كبيرة
وما أمكنش التوافق
اتطلقوا
وقررت درية إنها مش هتتجوز تانى
لكن البنت فضلتْ على اتصال بالسيد زيادة
اللى فِضِلتْ تتعامل معاه على إنه أبوها
لحدّ ما دخَّلها عالم السينما بفيلم «دعونا للحب»
طيب هـ تتقدم باسْم مين؟
الحقيقة إنها اختارت اسْم فنى
مالوش دعوة بـ دا ولا دا
اختارت اسْم سهير رمزى
أيوه سهير رمزى الفنانة المعروفة
ربنا يديها الصحة وطولة العمر