يسعد صباحك يادى الشعب

إلهى يصبحك ويربحك
وينولك اللى فـ بالك
إلهى يبعد عنك ولاد الحرام
ويكفيك شر تلزيقة خدمة العملا
ولا يوريك خوف الدفاع
اللى عنده ماتش قصاد أجايى والسعيد
ولا يبليك بـ زنقة
اللى واقف فى جامعة الدول العربية
ما بين العصر والمغرب
ويوقف فـ طريقك
ولاد الحلال
اللى بـ يحبوا التمثيل والغنا والكورة
وما يرميك فـ مهلكة السياسة

كونى له يسرية
يكن لك إبراهيم

خبر من أسبوعين
على جبر يغيب عن مباراة الإنتاج الحربى
خبر من يومين
على جبر يغيب عن مباراة تشيلسى
الخبر دا بـ يدينا كلنا الأمل
كلنا

من مظاهر استخدام الفيس بوك
بـ شكل لا أخلاقى
الناس اللى بـ ألاقيهم بـ يشيروا صور
لـ ستات أستغفر الله العظيم حلوين
هم الناس دول
ما يعرفوش إن من الواجب
ذكر المصدر اللى جابوا منه الصورة؟
أين حقوق الملكية الفكرية؟
إخص

مرة واحد وقفنى ف ميدان طلعت حرب
قال لى
من فضلك
عايز أروح شارع الشيخ ريحان
قلت له
روح بس ما تتأخرش

كل واحد منهم
دخل العلاقة
وف نيته تدمير الطرف التانى
هو هدفه
أستغفر الله العظيم ويخلع
وهى هدفها تتجوزه
الإنسان أصل الشرور

الراجل لما بـ يدخل فى الأربعينات من العمر
بـ يبقى أكبر من اللى لسه فى التلاتينات
وأصغر من اللى عدوا الخمسين
وبـ تبقى خبرته كبيرة
أو صغيرة
أو متوسطة
حسب التجارب اللى مر بيها
والتجارب اللى مرت بيه
بـ اختصار
مفيش زى رجل الأربعينات
الارتباط بيه رزق
لو لقيتيه
اوعى تفرطى فيه
آدينى بـ أقول لك أهو

القيامة خلاص هـ تقوم
بقينا عايشين فى زمن
الزوج فيه
بقى مضطر يطلب القهوة
عشان مراته تعملهاله
الله يرحمك يابا
كان قبل ما يفكر فى الحاجة
أمى تجهزها
عشان لما يفكر فيها
يلاقيها قدامه

كريزة المرارة
بـ تبدأ ألم خفيف جدا
يبدأ يتصاعد تدريجيا
لـ حد ما يوصل لـ ذروة الألم
ألم لا يحتمل
لا يحتمل يعنى لا يحتمل
يقعد فترة
لـ حد ما تاخد العلاج
بعدين
يبدأ يخف تدريجيا لـ حد ما يروح
اللى غايظنى حاجة واحدة بس
ليه الألم ابن ال....
لما بـ يتصاعد
بـ يتصاعد بـ سرعة أوقات السعادة
ولما بـ يخف
بـ يخف بـ بطء أوقات الكرب
ليه؟

زى أى إنسان
أم كلثوم كان عندها أحلام طموحات أمانى
زى أى إنسان
عقبات كتير
وقفت بين أم كلثوم وأحلامها طموحاتها أمانيها
لكن أم كلثوم مش زى أى إنسان
قدرت تتعامل مع كل العقبات دى
روضت اللى محتاج ترويض
واجهت اللى لازم له مواجهة
فشخت اللى مفيش مفر من فشخه
مفيش حد ولا حاجة
قدر يقف فى وش أحلام أم كلثوم
وتصدرها المشهد
إلا الزمن
معركة بعد معركة بعد معركة
من أول الزمن غير المناسب اللى اتولدت فيه
ثم تغيره المستمر
اللى بـ ينهى سيطرة أى حد
على أى حاجة
ثم الأمراض
ثم الأشخاص اللى الزمن بـ يختارهم
يبقوا على راس السلطة
أم كلثوم كانت واعية جدا
بـ إن الزمن لا يقهر
فى أواخر أغانيها
كان الزمن حاضر بـ قوة
«عايزنا نرجع زى زمان
قول لـ الزمان ارجع يا زمان»
«هذه ليلتى فقف يا زمانى»
«يا خوف فؤادى من غدى»
كان واضح
إنها حاسة بـ قرب انتصاره عليها
من 43 سنة
قال الزمن كلمته
وماتت أم كلثوم
بس تخيل
المعركة ما خلصتش
وفضلت تواجهه بعد موتها
وتخيل
إنها انتصرت

طريقة مجربة
لـ تخلص من سؤال الزوجة
هـ ناكل إيه؟
لما تسألك كدا
ما تقولش أى حاجة
بـ العكس
قول اسم أى أكلة تيجى فـ دماغك
بس تكون مالهاش معنى
مثلا
مسقعة مفرومة
تقول لك
مسقعة بـ اللحمة المفرومة يعني؟
تقول لها لا
المسقعة المسلوقة دى
مسلوقة ازاى يعني؟
يا ستى المسقعة الحلوة اللى انتى بـ تعمليها دى
تقول لك
مفيش بتنجان
وماليش مزاج لـ المسقعة
قول لها
يبقى شوربة كفتة مشوية
تدخل معاك فى نفس الحوار
تمشى ع الوصفة دى
تلات إيام
مش هـ تسألك فى الرابع
واحد يسألنى
طب وافرض برضه سألت؟
أقول له:
لا
دى تطلقها بقى وتنفد بـ جلدك
ولا أقول لك
طلقها دلوقتى واخلص

الأسبوع اللى فات
الساعة تلاتة إلا ربع صباحا
واقف عندى تحت البيت
توك توك
ما أعرفش مين اللى فـ التوك توك
بس هو راكن
ومشغل أغانى بـ صوت عالى فشخ
أعتقد المنطقة كلها سامعاه
لو كان الأمر هنا
مكنتش حكيت لكم
علشان دا مش غريب هنا
الغريب
إنه مشغل أغانى رمضان
مرحب شهر الصوم
ورمضان جانا
وأهو جه يا ولاد
تفتكروا
اللى كان فى التوك توك دا
ممكن ما يبقاش إنسان؟
روح واحد مات فى دخلة رمضان
فـ الزمن وقف عنده؟
طب تفتكروا
الشبح دا عايز إيه؟
فكرت أشغل قرآن
عشان أصرفه
بس اللى مانعنى
إن الأغانى حلوة
آه والله
حلوة أوى
قلت لـ نفسى
أكيد كمان شوية
هـ يوصل لـ تم البدرى بدرى
ويقفل بـ العيد فرحة
ويروح
وقد كان