الأرنب الكسبان

قول لى يا صاحبي
هو فـ قصة الأرنب والسلحفاة
مين اللى كسب؟
- السلحفاة
• مظبوط، دا كان رأى الحمار
- ......
• استنى بس
ما تزعلش
مش قصدى أشتمك
هو إنت حمار؟
- لأ
• طيب
أنا بس عايز أقول لك
إنهم قالوا لنا حتة من الحكاية
وما قالوش بقيتها
لا قالوا أولها
ولا قالوا آخرها
قالوا الحتة اللى عايزين يقولوها
- وانت عارف الحكاية؟
• آه، بس قبل ما أقولهالك
عايز أسألك سؤال:
هو أصلا السلحفاة لما كسبت، كسبت إيه؟
- كسبت السبق
أيوه، اللى هو إيه يعني؟
إيه جايزة السبق دا؟
يعنى إيه اللى خدته السلحفاة
واتحرم منه الأرنب؟
- ما قالوش.
• شفت!
تعالى بقى أحكى لك الحكاية:
الأسد بص فـ الغابة
لقى الحمار عفي
فكر يخليه يشيل ويحط ويتركب ويروح و ييجي
جاب مستشاره الديب
وقال له: عايزين نعمل كدا
تفتكر الحمار ممكن يطلب إيه؟
الديب رد: وليه يطلب يا مولاي؟
ما نشغله بـ أكلته
الأسد قال: إنت عبيط يا ديب!
ما هو بـ ياكل وبـ يشرب وزى الفل
الديب ضحك وقال:
يا مولاي
كل حاجة وليها حاجة
الحمار طيب، عاطفي، غلبان
لو قدرنا نقنعه
إن الشيل والحط ده
هو الشرف
هو الفخر
هو البطولة
ممكن كمان نقاسمه فـ أكلته بعد كدا
فهم الأسد إن الديب عنده خطة
قال له: وازاى دا يتعمل يا ديب؟
يعنى كل ما نشيله شيلة
نقول له: شيل يا بطل؟
الديب رد بـ سرعة:
اوعى يا مولاي
ما تآخذنيش على جرأتي
بس لو عملنا كدا
كـ إننا بـ نقول إنه له فضل علينا
لازم هو اللى يقول كدا لـ نفسه
زمجر الأسد
وقال: بدأت أزهق يا ديب
انفض اللى عندك مرة واحدة
رمى الديب بـ الخطة اللى كلنا عارفينها
جاب السلحفاة والأرنب
وعمل المسابقة الدولية لـ الغابة
الأرنب فكر
هو أنا أكسب إيه يعنى لما أروح الحتة اللى عايزينها؟
فكك يا عم
الخلق دى هبلة
وراح
لعب وكل وشرب وعمل سيكو سيكو
وراح حفلة وتعب فـ ريح شوية
ولما نشط قعد يدور على الجزر
بـ اختصار
عاش «حياته»
حياته هو
والسلحفاة اتبسطت لما كسبت
والحمار اقتنع إن السلحفاة هى اللى كسبت
ومن ساعتها ما بطلش شيل وحط
- ........
• إيه؟ الحكاية ما عجبتكش؟
- الحكاية دى ممكن تعجب الأرنب
ممكن تعجب السلحفاة
لكن الحمار
أكيد لأ
قوم من قدامى