الحكمة الإلهية فى الوصول لـ «الأراضى الروسية»

طول عمرى مقتنع بـ شوية حاجات أساسية فى حياتى
منها
إنه مفيش حاجة بـ تحصل صدفة
مفيش حاجة اسمها حظ
مثلا يعنى
فى كرة القدم
لو عايز تكسب
لو عايز تنجح
لو عايز يكون لك مكان بين الكبار
لو عايز تحقق إنجازات
لو عايز تدخل التاريخ
يبقى تجتهد
وتجتهد دى
عايدة على الجميع
يعنى يبقى عندك دورى كورة قوى
عليه إقبال جماهيرى
بـ يتباع لـ محطات العالم بـ أسعار عالية
أو يبقى عندك قاعدة كبيرة
من المحترفين فى كل أنحاء العالم
خصوصا الدول المتقدمة كرويا
يعنى على الأقل خمسين ستين لاعب فى أوروبا
تختار منهم
لازم يبقى عندك منظومة كروية
بـ تفكر بـ أسلوب علمى
عندك ملف لـ كل لاعب
فيه كل دبة نملة عنه
تختار على أساسه لاعبين
لياقتهم البدينة مكتملة
عندهم ذكاء داخل الملعب وخارجه
يكون عندك تنظيم لـ الوقت فى منتهى الدقة
وعارف مواعيدك وأجندتك
تلات أربع سنين قدام
حاجات كتير أوى مطلوبة لـ النجاح
إنما الحمد لله
الحمد لله
المنتخب المصرى لـ كرة القدم
نجح إنه يغير طريقة تفكيرى تماما
اتضح إن كل الكلام دا مش مهم
عادى يعنى
ممكن توصل لـ أعلى مستوى فى العالم
المونديال
وتناطح الكبار
من غير ما تعمل أى حاجة من المذكور أعلاه
المهم النية الصالحة
وعمل الخير
وبـ سر الدعا والسجدة كله هـ يتحقق بـ إذن واحد أحد
راجع معايا كدا
من أول المشوار
لاعبنا تشاد
وكنا من غير محمد صلاح
اللى هو عماد الفريق ونوارته
اتغلبنا واحد/ صفر
تشاد
اللى عمرها ما لعبت حتى
فى الدورة الرمضانية بـ أبو النمرس وضواحيها
إنما ربك بقى
تحصل أزمة بين لاعبى تشاد
والاتحاد بتاعهم
يخليهم يتأخروا، ويوصلوا قبل الماتش بـ دقايق
نغفلهم فى الشوط الأول
بـ أربع إجوان
نيجى بقى لـ القرعة
نتايجنا خلت تصنيفنا تانى
زعلنا
لـ إننا عبط
مش عارفين الخير فين
مش عارفين ربنا شايل لنا إيه فـ الآخر
جت قرعتنا مع غانا
زعلنا أكتر
مش بـ أقول لك عبط
فاكرينها حكاية كورة ومستويات
ولسه متعلم علينا من الستة
ما نعرفش إن ربك حنين
وإنه لـ المنكسرين جابر
قوم إيه
غانا تتعادل مع أوغندا
وإحنا نكسب الكونغو
عادى
شقانا وعرقنا
إنما تلاعب غانا
90 دقيقة، الكورة فى نص ملعبك
وتروح عليهم بـ هجمتين اتنين
اتنين بـ العدد
فـ ييجى منهم جونين
سبحان الله
سبحان الله
واضح إن الست الوالدة
قالت لـ الأستاذ كوبر
روح يا ابنى
إلهى يجعل لك فـ كل هجمة هدف
ونفرق عنها خمس نقط
وخلاص كدا
نغلب أوغندا والكونغو رايح جى
فـ نصعد
ساعتها اتغرينا
حسينا إن النصر من عند أنفسنا
وهو كله من عند الله
فـ ربك حب يدينا درس
خسرنا من أوغندا
رجعنا تانى نقول يا رب
يا رب
يا رب
راحت غانا متعادلة تانى يوم
تانى يوم مع الكونغو
مش مصدق إن ربنا عمل كدا؟
طيب إيه قولك
إن غانا تغلب الكونغو فى الكونغو
بعدها بـ أربع أيام
وتغلبها خمسة
خمسة
مش واحد ولا اتنين
خمسة
وسبحان الله
سبحان الله
مصلحتنا إن غانا تتعادل الماتش
وتفوز الماتش التانى
ما هى لو اتعادلت الماتشين
تبقى خرجت رسمى
فـ يبقى ماتش أوغندا مش مهم بـ النسبة لها
لكن ربك بقى
ظبط نتيجة الماتشين زى ما إحنا عايزين بـ الملى
طب أوغندا دى
اللى بقى ليها فى المنافسة
مممممم
كدا بقى يا رب
عايزين نتيجة تفصيل بين غانا وأوغندا
عايزينهم يتعادلوا
فـ كل منتخب منهم يخسر نقطتين
وكدا
ندخل ماتش الكونغو
ديل المجموعة
وإحنا مستنكنيصين
نغلبها نُص صفر حتى
فـ نتأهل
قوم إييييه
سبحان الله
سبحان الله
النتيجة اللى إحنا عايزينا بـ الظبط
هى اللى تحصل
يعنى غانا تسجل هدف
الحكم يلغيه
تيجى ضربة جزاء لـ أوغندا
ما يشوفهاش
تيجى ضربة جزاء لـ غانا
ما يشوفهاش
ييجى هدف تانى لـ غانا
مفيهوش ريحة الشك
قوم ربك يلهم حامل الراية يرفعها
تسلل
الراجل جيان بتاع غانا
قال فـ نهاية الماتش
إننى أشتعل غضبا
الهدف سليم يا ناس
لكن ربك لما يريد
اعترض بقى
ندخل ماتش الكونغو
فاكرين إننا هـ نجيب كل خمس دقايق جون
لكن لأ
منه له
جى رايح منه له
وكله بـ إذنه
وكله بـ أوانه
نجيب هدف قبل النهاية بـ شوية
نفرح
نملا الدنيا أغانى
فـ ييجى فيك هدف قبل النهاية بـ دقيقتين
وبعد ما خلاص
تحس إنها راحت منك
وإن التصفيات دى هـ تحصل اللى قبلها
واللى قبل اللى قبلها
ييجى ربك
يقول لك: ما تحزنش
ما تيأسش
وشوف يا مؤمن السيناريو
ضربة جزاء
اللى هو تفضل متعلق لـ آخر فيمتو ثانية
وما يبقاش ليك ملجأ
غير يا رب
يا رب
يا رب
وتيجى ضربة الجزاء
وميت مليون بق
بـ يقولوا كلمة واحدة
الحمد لله
الحمد لله
أنا بـ أقول يا جماعة
نعمل معسكر إعداد المنتحب
فى السيدة نفيسة
آه والله
منه له
جى رايح منه له.•