يا رب دى مش دى

ميعادنا مع أوغندا
أصعب مرحلة فى قصة المونديال
لو كسبنا
أقدر أقول لك:
ألف ألف مبروك
لو لا قدر الله
أقدر أقول لك:
عظم الله أجرك
أشوفك 2022 إن شاء الله
تعالى بقى
نفتكر أول مباريات لعبناها ضد أوغندا
أول مباراة
نظريا
المباراة دى كانت فى الدور قبل النهائى
لـ بطولة كأس الأمم الأفريقية 1962
إنما فعليا
البطولة كلها كانت 4 دول:
أثيوبيا الدولة المضيفة، ومصر وتونس وأغندا
فـ لعبت أثيوبيا مع تونس
ومصر مع أوغندا
بعدين الخسران مع الخسران ع التالت والرابع
والفايز مع الفايز فى النهائى
والمباريات كلها كانت على ستاد سيلاسى فى أديس أبابا
كانت أول مرة نلاعب أوغندا
كان فيه تصور
إننا هـ نسكعها خمسة ولا حاجة
الاتحاد الأفريقى أساسا
كان يدوب ما كملش خمس سنين متأسس
وعندنا تصور إنه مفيش كورة فى أفريقيا
بس الماتش كان صعب
بـ المناسبة: الحكم كان تونسى، وحاملين الراية كانوا من أثيوبيا
كان الحكام بـ يبقوا من الدول المشاركة
مثل مصر فى المباراة:
عادل هيكل لـ حراسة المرمى، أمامه على بدوى، أحمد مصطفى، طارق سليم، سمير قطب، ميمى الشربينى، صالح سليم، طه إسماعيل، بدوى عبدالفتاح، رأفت عطية، مصطفى رياض
ومثل أوغندا:
جون أجارد لـ حراسة المرمى، أمامه سسمبوا، أتيما، ديفيد أوتى، بونى نيزى، كلايف بوند، مابيريزى، سيسموجابى، كاسيجوا، سيمامبو، كونجو أودونج
طبعا لو كتبت لك أى 11 اسم كلهم أفريقى ماشى
بس والنعمة دا اللى كتبته الجرايد
إنما اللاعيبة المصريين عارفهم
وكان المدير الفنى لـ مصر هو محمد الجندى
والمدير الفنى لـ أوغندا اسمه
سامسون ياجا
بس يا سيدى
بدأت المباراة
وقبل ما تعدى تلت ساعة
تحديدا فى الدقيقة 17
أوغندا لطشت جون
ونامت عليه بقية الشوط
وكان واضح جدا الارتباك على لاعبينا
فى الشوط التانى الحال اتعدل شويه
وبعد خمس دقايق بدوى عبد الفتاح سجل التعادل
شويه وصالح سليم جاب التاني
وكسبنا
وعدينا
بس اتغلبنا فى النهائى من أثيوبيا 2/4
وتونس غلبت أوغندا ع التالت والرابع 3/ صفر
ودى كانت حكاية أول ماتش
بين مصر وأوغندا
رابع مباراة
اللى كانت بيننا وبينهم
ربنا ما يعودها
ولا يجعلها من حظنا ولا من نصيبنا
دى اللى الجرايد كتبت عنها:
فضيحة فى كمبالا
كانت فى تصفيات كأس الأمم الأفريقية
كنا فى مجموعة مع كينيا وأوغندا
كسبنا كينيا
وخلاص لو اتعادلنا مع أوغندا
يبقى صعدنا
رحنا
وإحنا متعودين على مكسب أوغندا
محدش كان عنده أدنى شك إننا هـ نغلبهم
وهـ نغلبهم إسكور كمان
الماتش كان 1965
يوم 27 مارس
لعبنا بـ تشكيل مكون من:
سيد عبد اللاه، الإسناوى والطباخ وأبورجيلة، محمد بدوى، فتحى بيومى، حمادة إمام، رضا، الجوهرى الصغير، الشاذلى، فاروق السيد
على جنب كدا
اللاعب الكبير العظيم الراحل
ثعلب الملاعب
حمادة إمام
رصيده من المباريات الدولية
خلال تاريخه الكبير
هو عدد 2 مباراة، 2 من غير صفر ع اليمين
2 حاف حاف
مباراتين
وبـ الفصحى: مباراتان اثنتان
واحدة دى
واتغير فيها بعد 27 دقيقة
وشلنا أوبح
والتانية كانت قدام ليبيا
واتعادلنا فيها 2/2
ودمتم
وكل عام وأنتم بـ خير (بـ صوت زكريا موافى)
المهم،
الماتش بدأ، 
واحنا بـ نتهاجم من اليمين والشمال
ومن ورا ومن قدام
ومن فوق ومن تحتط
ولبسنا جول
بعدين اتعادلنا
بس دا ما فرقش حاجة
لـ إن أوغندا كملت
ومع رأفة الرأفة خسرنا1/5
الجرايد تانى يوم
شنت هجمة على سيد الطباخ
المدافع بتاعنا
وتقريبا شيلته الهزيمة
جماهير الأهلى
اتكلمت عن غياب نجوم الاهلى
وإن الفريق اتجمع من لعيبة الزمالك والإسماعيلى
وقعدنا فترة طويلة
بـ نعالج آثار العدوان.
بين الماتش الأول دا
والماتش الرابع دوكهه
كان فيه ماتشين
تقدر تحسبهم
وتقدر ما تحسبهمش
علشان دول كانوا فى تصفيات أوليمبياد طوكيو
1964
الفريق اللى بـ يخوض الألعاب الاوليمبية
المفروض هو الفريق الأوليمبى
بس زمان
كان الفريق الأوليمبى هو الفريق الكبير
ليه بقى؟
علشان الفريق الأوليمبى
كان اللاعبون الهواة
ومش مسموح بـ اشتراك المحترفين
فـ إحنا كنا فى أفريقيا كلنا هواة
فـ كان الفريق الأوليمبى
هو نفسه الفريق الكبير عادى
المختلف بس هو صفته
اللطيف
إننا كسبناهم رايح جاى
هناك 1/4  بـ أهداف شحتة (سوبر هاتريك)
وهنا 1/3
بـ أهداف بدوى عبدالفتاح (جولين) وحسن الشاذلى
وكملنا ووصلنا الأوليمبياد
مش بس كدا
دا إحنا كنا خلاص هـ نحقق ميدالية
لـ إننا لعبنا ع التالت والرابع
يعنى وصلنا سيمى فاينال
بس خسرنا
إنما دى كانت أحسن نتيجة حققناها
على مستوى المنتخب الكبير
إذا اعتبرناه المنتخب الكبير
خامس ماتش بقى
دا اللى هـ نقفل بيه
كفاية تعرف تاريخه
4 يونيه 1967
يعنى قبل النكسة بـ يوم
لسه عايز تعرف عملنا فيه إيه؟
عموما
كسبناه واحد صفر بـ جون
لـ الكابتن الكبير أوى
محمود بكر
الله يرحمه
ويرحم الجميع •