رباعيات

أعشق جنون البحر وأعشق سكونه
وأتمنــى يبقــــى هوه أنا أو أكونـه
البحر هــش فى وشى قال.....
ما أنتم بحور زيى بس كونوا
•• ••
يا ما فيك يا بحر حاجـات كتير مختفية
فيك لولى حر.. وفيك نجوم منطفــــية
وأمواج عفية.. والقرار هادى عادى
أنا اللى فيك يا بحر وألا أنت فيا
•• ••
تايه أنا ف بحـــــــــــر الحياة باتنفض
والموج بيعلا ف قلبــــــــى وبينخفض
نجم الطريق يشاورلى على ميت طريق
إيه تقبل منها وإيه يترفض... ؟!
•• ••
بين آه ولأ .. واخدانى لحظـــــــــة قلق
ح أصرخ بعزم الصوت وأصحــى الملأ
إلا وبرق فى البال خيال قال لى عيش
سلمت لك قلبى .. شراعى انطلق
•• ••
ح تقوم يا موج ؟! وماله ما أنـــــــا قمت لك
ح تروح. تحمحم.. برضه حمحمت لك
معلوم يا موج.. ما هو أنت علمتنى
إنك ح تغدر بيا لو نمت.. لك
•• ••
الموج ده .. ولا عرف خيل الجنون؟!
ولا ده شوق مطلــــــوق لعالم حنون؟!
على فين يا موج يا حرون؟ ضحك لى وقال:
ح أسيل فى ليل الويل لشط المنون
•• ••
مركب وبحر .. وواد وبنت.. وهوى
فجأة عوى الريح.. نجم مـــن فوق هوى
طلعنا نبكى.. كل حى فى طريق
ليه يا حبيبتى الفرحة بتموت هوا؟!
•• ••
البحر قال لى اسمعنى.. أنا مش ح أضلك
تبت فى خلك .. هوه ده اللى فاضل لـــــك
أنا قلت خللى خلا بى.. قال: خللى بالـــك
تبت فى خلك.. يعنى تبت فى ضلك
•• ••
سوى سمك موسى ف زمن مش سوى
مسلم ده ولا مسيحى.. أو موسوى؟!
با سأل أنا.. قام بص لى بنص عين!
فين الجواب؟ قال ده سؤال مأسوى
•• ••
شفت السمك فى البحر داخل سبق
واللى بياكل أخوه .. واللى اتدبق
أنا قلت ليه بتاكلوا فى بعض ليه؟
وكلكم آخرتكو نفس الطبق!!
•• ••
الرمل قال: سمعتو ا آخـــــــــر نبـــأ
الموج على الموج انطبق م الشبـــــــق
قال المحار: أهو ده اللى عاش الحياة
مش اللى زيى فى القرار اختبأ
•• ••
أحلى ما فيك.. إن أنت دايما جديد
فى لحظة صافى.. ولحظة جافى وشديد
والجرح يدبل فيك.. وأرض العباد
من الرقاد ع الجرح عبت صديد
•• ••
«بتحبنى يا بحر».. .قال «وأنت ابنى»
مصاحبنى. وشاربنى.. وجنونك عاجبنى
«طب ليه يا عينى».. لسه ح أسأل لقيت
موجه ضاربنى.. قالبنى .. «إيه ح تحاسبنى»