أغنية أراجوز

أراجوز.. أراجوز.. إنما فنان
فنان.. أيوه.. إنما أراجوز
ويجوز يا زمان أنا كنت زمان
غاوى الأرجزة طيارى .. يجوز
إنما لما الكيف بقى إدمان
باجى أبص لشىء واحد أرى .. جوز
أرى إيه؟ أرى إيه؟ أرى أرى أراجوز
••••
فلسان .. كحيان .. أيوه أنا فلسان
إنما برضك .. راجل إنسان
بأضرب بالألف لسان ولسان
وباكلها بعرقى .. ومش إحسان
راجل والرجولية لا عضلات
ولا ألابندة وسيما وحركات
الرجولية الحقيقية ثبات
قدام جبونية أى جبان
••••
أراجوز أنا وأحمى أرى أرى إيه؟
أحمى قراريط الناس من مين؟
من الناس الأرى أرى إيه أرى إيه؟
من الناس القراميط الملاعين
ماهو أصل أنا مش من الأرى أرى إيه
مش من القراطيس
ولو الحال مال مقعدش أنا على
أرى إيه أرى إيه؟ .. قرافيصى وأطنش ع الأندال
لازم أشك الأندال مهموز
وأدوس ع اللى افترى والعنطوز
م أنا أرى إيه أرى إيه؟؟ أرى أرى أراجوز
••••
أراجوز.. وشجيع.. والدنيا ميدان
فارس.. حارس.. وأقف ددبان
وإذا بان للشر نيبان وزبان
باحمى الغلبانة والغلبان
وشجاعتى ماهياش فى الطاخ طيخ
دى شجاعة تفكير وتماخيخ
الأرض أضربها تجيب بطيخ
بذكاوتى وأخللى الخلا بستان
••••
أراجوز أنا .. والدنيا أرى إيه؟
قرشانة واحنا شبر شبيط
ياما قرمتنى وأرى أرى إيه؟
قرصتنى ف لباليبى وأنا كبير
فسرحت أنفخ أرى إيه أرى إيه؟
أراغيلها وأغنى يا ليلى يا عين
وأتمسخر على أرى إيه أرى إيه؟
أراذلها الفجرة الطماعين
و أضَّحَك كل صبى وعجوز
ع اللى بيتنطط فرقع لوز
مانا أرى أرى إيه؟ أرى أرى أراجوز
أراجوز.. وسايقها هبل فى جنان
وأنا قلبى.. ملان جدعنة وحنان
وأبان ساهى سهتان سهيان
إنما عقلى للعدل.. ميزان
أنا فلتة.. إنما مش فلتان
وساعات حرنان .. وساعات زنَّان
يمكن علشان وحدانى.. ما ليش أراجوزة تاخدنى بالأحضان
أراجوز أنا.. وأقدر أرى أرى إيه؟
أراعيكى وأشيلك فى عيونى
وإذا مرة زعلتى أرى أرى إيه؟
أراضيكى بعقلى.. وبجنونى
حُطِّى من السما على أرى أرى إيه؟
أراضيّه وأسلِّم لِك أمرى
وكُلِى معايا فى أرى إيه أرى إيه؟
قروانتى يا كروانة عمرى
وبَدَل مانا كده ملوى الَبَزبوز
أصبح لك جوز معزوز محظوظ
إيه يا ترى إيه؟ أرى أرى أراجوز
أرى إيه؟ أرى إيه؟ أرى أرى أراجوز