من الإبرة للصاروخ حتجهز واتجوز

خلقت حواء، لتكون ملكة على الأرض.. جوهرة ثمينة صعبة المنال.. تعيش داخل قوقعتها محتفظة بجمالها وأنوثتها، حتى يأتى اليوم الموعود.. اليوم الذى تنتظره كل فتاة، وهو تجهيز عش الزوجية.. وبما أننا نتحدث فى هذه الحلقة عن تجهيزات العروسة.. فكان لابد وحتما نزور أكثر الأماكن التى تتردد عليها العرايس من جميع المحافظات.. وهو جمهورية الموسكى أو بمعنى أدق سوق الموسكى.. فهو سوق به كل احتياجات العروسة من «الإبرة للصاروخ».. ومن أهم أساسيات جهاز العروسة هو مفارش غرفة النوم.


مفارش السرير


فقد أخبرنا محمود - صاحب محل مفروشات عن أسعار المفارش وحركة البيع والشراء قائلا:
قلت حركة البيع والشراء بشكل كبير بعد ارتفاع الأسعار.. لكن لدينا كل ما تحتاجه العروسة وبالأسعار التى تريدها.. فهذا المحل متخصص فى مفارش العروسة التى تتضمن ملايات السرير ومفارش الستان والقطيفة والبطاطين والكوفرتات والفوط واللحاف.. وتتراوح الأسعار على حسب مقدرة الزبون.. فجهاز البنت أقل حاجة يبدأ من 5 أو 6 آلاف جنيه.. ويتكون من طقم ملايات مخلوطة، بمعنى أنه يكون قطن داخل فيه نسبة بوليستر ضعيفة ويبدأ سعره من 65 أو 75 جنيهًا.. ويتكون من طقم سرير 5 قطع وألوانه ثابتة.. والكمية تختلف على حسب العروسة، فمثلا العروسة الريفية تدخل بـ 30 ملاية على عكس العروسة القاهرية بتدخل 10 أو 12 ملاية.. لأن من عادات الأرياف التباهى بكثرة المفروشات.. وبعد طقم الملاية يأتى مفرش السرير إما قطيفة أو ستان على حسب ذوق العروسة.. ويبدأ سعره من 120 حتى 300 جنيه ويكون 3 قطع.. ويأتى معها كوفرتة السرير والبطانية واللحاف وتبدأ أسعارها من 130 و280 على حسب إمكانيات الزبون.. ومعها طقم الفوط و2 بورنوس واحد رجالى وآخر حريمى.. فالمصرى يبدأ من 120 وحتى 350 جنيهًا بينما يبدأ المستورد من 700 وحتى 850.
لذلك أنصح العروسة بأن تجهز نفسها بالمنتج المصرى، فهو أحسن خامة لأنه قطن طبيعى 100 فى 100 ومن غير ألياف صناعة بالإضافة إلى الجودة العليا.. لكن للأسف الزبون بيدور على أقل الأسعار.. بالتالى بيشترى المستورد عشان جودته عالية وسعره أقل..•

مفرش السفرة


جهاز العروسة لا يكتمل بدونه لأنه قطعة تزين المنزل وتظهر جمال الأثاث، حيث إنه طقم مفارش كامل للسفرة وترابيزة الصالون والإنتريه وأرفف النيش، ويقول مصطفى عبدالكريم بائع مفارش فى الموسكي: عندى طقم المفارش ممكن يبدأ من 20 جنيهًا، وفيه منه مصرى وصينى وهندى وتركى، لكنى أنصح العروسة دائماً بشراء المفارش المستوردة لأنها أحلى وأقيم وعمرها أطول من المصرى وأحياناً بتكون أرخص كمان، يعنى مثلاً مفارش السفرة الصينى أرخص من المصرى ويرضى ذوق العروسة لأنه على قد الأيد وشكله حلو فى البيت، لكن المفرش المصرى للأسف جودته ضعيفة أوى، وربنا يكفينا شر الناس أصحاب المصانع رفعوا سعر المنتج المصرى جداً بعد زيادة الجمارك على المستورد ودا خلاه مالوش لزمة فى السوق والزباين مش بتشتريه خصوصاً أن جودته رديئة.•

أدوات المطبخ


وطبعا مينفعش نخرج من سوق العتبة من غير ما نعدى على حمام التلات، يعنى فرش المطبخ، يعنى أطقم الصينى والبورسيلين.. فقد أخبرنا عادل عن الجديد فى السوق قائلا:
العروسة بتيجى هنا تلاقى كل اللى عايزاه فى مطبخها.. من أول 100 جنيه لغاية 7 و8 آلاف جنيه تقدر تفرش مطبخها.. وبأشكال جميلة.. فلدينا كل المنتجات الغالى منها والرخيص.. فمثلا لدينا حلل «النحاس والألومنيوم» رغم الإقبال الضعيف عليها لأنها تسبب أضرارًا على الصحة، لكنها متوفرة لأن فيه ناس على قد حالها بتشتريها.. لكن بالنسبة لجهاز العروسة، 10000 جنيه تقدر تفرش بهم مطبخها، وده بأقل سعر.. فأطقم الصينى تبدأ من 180 و250، ولدى أطقم تصل 4 و5 آلاف جنيه.. ومن أنضف أنواع أطقم الحلل التى أنصح بها دائما العرائس بشرائها هو أطقم حلل السيراميك التى تبدأ من 900 جنيه أما الجرانيت، فيبدأ من 1500.. أما بالنسبة لأطقم الكوبايات والأطباق، فتتراوح أسعارها على حسب الإمكانيات المادية للعروسة.. فلدى أطقم بورسيلين تبدأ من 100 جنيه.. فالعروسة الآن تنجذب إلى أطقم الكوبايات ذات الألوان والرسومات، كى يعطيها لوحة فنية داخل مطبخها.. فلدى الأطقم المصرى والمستورد بكل أنواعه وخاماته وأسعاره، لأننا نعمل على أرضاء العروسة.•