10 طرق.. لـ«قهر الرجل»

فى البداية.. لنعرف كيف تقهر المرأة الرجل.. يجب أن نعرف كيف يقهر الرجل المرأة لنستطيع قهر قهره بسهولة ويسر ونعومة منقطعة النظير.
كيف يقهر الرجل المرأة؟!
1- أولاً بفلوسه.. أى بنجاحه فى عمله.
2- بنفوذه وسلطته.. أى بعلاقاته.
3- بحبها له.. إذن الحل فى إيدك.
4- بذكائه وخططه المحكمة.. أى بعقله.
5- بصبره وطولة باله.. أى ببروده.
6- بجوازه من أخرى وأن هذا حلال.. إذن بالحلال.
7- بقوامته على المرأة وأن عليها الطاعة.. عادات وتقاليد.
8- التفرقة بينها وبين الرجل حتى إذا كانا لهما أولاد.. عنصرية.
9- يرجع نجاح المرأة دائمًا إما لجمالها أو لأنها امرأة والمعنى معروف.
10- وأخيرًا.. يقهرها عندما لا يشعرها بأهميتها عنده وحبه لها وتمسكه بها.. بخله فى المشاعر.
• إذن.. كيف نقهر قهر الرجل
1- إذا سيطر عليكى بفلوسه.. هم حاجتين مالهمش ثالث.. يا تنعمى وتحلوى كده لغاية ما تفلسيه وتبقى كل حاجة فى إيدك.. يا إما تنعمى برضه عشان يسيبك تشتغلى وتنجحى وما تعتمديش عليه فى أى مواضيع مادية، ويبقى صباعك تحت ضرسه.. من الآخر.. حطى صباعك فى بقه بس بعدما تخلعى ضروسه كلها.
2- نفوذه وسلطته وكما تم التوضيح سابقًا أنها علاقات.. يبقى يا إما كل ما تروحى معاه مكان  تفضحيه بهدوء كده وكأنك مش قاصدة خااالص.. يا إما هو مش أحسن منك فى حاجة.. أجندتك فى جيبك وابتسامتك فى وشك وعلاقاتك قدام علاقاته.
3- حبك ليه هو أكبر سلاح ممكن يقهرك بيه يا خايبة.. ماتبينيش إنك بتحبيه، حاولى دائمًا أنك تحسيه أنك ولاهتموتى من غيره ولا حاجة.. وإن فى دايمًا عربية نص نقل مليانة شباب من أجمل وأقوى وأغنى شباب البلد مايشين وراكى يستمنولك الرضا.. بس أنت ترضى.. لأنه لو حس إنه هو المغفل الوحيد.. أقصد أن هو حبيبك الوحيد.. ساعتها هيقدر يقهرك.
4- يقهرك بعقله وذكائه.. سهلة دى.. جننيه.. خللى كل شيء منطقى.. والعكس.. لكن لازم أصدقائك المخلصين يقفوا معاكى فى الحكاية دى.. فالصديق وقت الضيق ولازم ساعات نومه تقل عشان يفقد القدرة على التركيز والتفكير.. وطبعًا هناك طرق كثيرة تقدرى تطيرى بيها النوم من عينه.. أكيد مش هتغلبى.
5- البرود.. صعب.. لكن أنت قدها وقدود.. يتبارد.. اتباردى.. والبقاء للأبرد.. للأثلج.. اللى هيفقد أعصابه هو اللى هيركبه الغلط.. يبقى لازم تركبى الغلط عليه وتخليه كمان يدلدل رجليه.. وتبقى على لسانك كلمة واحدة.. «عمال يتعصب ويغلط.. مش عارفة ليه!!» وبكده يعديكى العيب ويبقالك عنده دايمًا حق.
6- هو اتجوز عليكى بالحلال وأنتى أطلبى أبغض الحلال لأن الجواز التانى من غير سبب ........
7- قوَّام على المرأة.. إذا فقد عقله وفلوسه وهدوءه وثقته فى نفسه.. قوامة إيه بقى.. انسى.
8- العنصرية.. إذا كان هو عنصرى.. خليكى أنت «فيمينيست» «feminist» يعنى أى شيء مذكر ما تخلهوش فى حياتك.. ثلاثة ماشى مؤنثة.. بوتاجاز «لأ» يجيبوا أكل من بره كشرى لأ مذكر.. كفتة وريش آه مؤنثة.. نوم لأ مذكر لكن خروجة مؤنثة.. ورينا بقى العنصرية هتنفعوا بإيه.
9- إذا شكك فى نجاحك لأنك امرأة شككى وش فى رجولته.. لأن لو النجاح بيجى بالطرق الشمال.. يبقى هو أكيد تنازل عشان ينجح يا ترى أتنازل عن إيه؟!
10- إذا كان بيقهرك ببخله فى مشاعره وفلوسه وحنانه.. يبقى مستحملاه ليه يا باردة سيبيه أنت فعلاً تستاهلى القهر. •