أنا عاشق

لا انا مايل على كفوفك

ولّا باتهجى ف حروفك

أنا عاشق ومش واحد

من الألف اللى ف صفوفك

 

أنا فوق اختياراتك

إذا كنتى ح تختارى

يا إما اسكن ف نبضاتك

يا إما تفارقى مشوارى

 

أنا عشقت النسيم الحر

ومش ممكن سنينى تمر

على باب انتظار جاحد

أنا عاشق

ومش واحد

من الألف اللى ف صفوفك

….

أنا مش واحة للراحة

ف رحلة بحث عن ذاتك

ولا ضمة ف عز الليل

بتعزف لحن لذاتك

 

أنا عاشق بقلب وصوت

أنا مغرم بحُبك موت

وعينى ع اللقا الخالد

أنا عاشق

ومش واحد

من الألف اللى ف صفوفك