يا عزيز عنينا
جمـال بخيـت
يا عزيز عنينا يا زارع جنينة فيها قمح جُرنك فيها رغيف لفُرنك فيها العلم.. كرنك هندسة.. وتحدى والزمن يعدى يلقى سد عالى بيأمم قنالى وبيفتح جديدها شريانها ووريدها مصر ف عز عيدها ولا حد يعاندها كل الدنيا تحضر وتغنى نشيدها ملكة.. والملايكة تيجى تبوس ف ايدها الأمل رايدها والفرح.. قاصدها العريس مراكبى والعروسة زينة
ياعزيز عنينا
يا زارع جنينة
نابتة بين شجرها
شابة بصدر عالى
تخطف قلب مينا
تأسر الهلالى
خلخالها.. خيالى
وقوامها اتبنالى
ف جبينها.. جمالى
ف عيونها اكتمالى
كلما.. التقينا
يا عزيز عنينا
يا زارع جنينة
فيها ورد زاهى
للعشق الإلهى
من إله بيمسك
ف المعبد ميزانه
للرحمن بيحفظ
للكون اتزانه
من وطن حنانه
نقش على المسلة
للمادنة اللى رافعة
للمولى أدانه
بنصلى ف ميعادها
وتضلل علينا
ياعزيز عنينا
يا زارع جنينة
النسمة دى سارحة
ف الأرض اللى طارحة
والبستان بفرحة
قال للدنيا: مرحى
شهد الشهدا يصحى
ويبارك نجاحه
كل حلم طيب
الأمل أتاحه
ناخد بكرة صورة
فى حفل افتتاحه
كل حلم طيب
أطلقنا سراحه
وأديناه سلاحه
من ثورة يناير
ابتدا.. وبدينا
يا عزيز عنينا
يا زارع جنينة
ورد ف حضن ورد
فيها بحر ابيض
فيها بحر أحمر
مشتاقين لبعض
اتقابلنا جمعا
ف القناة نغنى
واتواعدنا وعد
مصر الحرة تصبح
جنة خير وسعد
تتنفس ضميرنا
تلبس من حريرنا
تاكل من ايدينا
يا عزيز عنينا