بخاف البُعد

بيقولوا إن انا شبهك جدا

بيقولوا إن احنا بنشبه بعض

واخدين من بعض حاجات ياما

أنا برضو يا أمى بخاف البُعد

زيك بالظبط

أنا شبه الخوف اللى ماليكى

بتحبى تطلى على الدنيا

وبحب إنى أطل عليكى

واتطمن لما تصحينى

تطمنى لما افتح عينى

واقول بالعافية صباح الخير

ياللى انتى صباحك غير الغير

الشمس بتطلع بيكى وبس

والكون بينور بعيونك

إحساسى بدونك عمره ما حس

أنا يومى بيبدأ مع يومك

وسنينى فى نظرك هما يومين

عديت تلاتين

وف روحك طفلة معدتش عمر التسنين

بيقولوا كبرت

وأنا أصلا تُهت

أنا لسه كفوفى بتتشعلق وبتمسك فيكى

وبخاف فى الزحمة أتوه أكتر فبنادى عليكى

وأما اغلط تضحك وتأكد أنى مبغلطش

وأكيد الغلطة ماهيش غلطة وان حصلت ليكى

هو انتى ملاك ونزل ع الأرض

ولا انتى الأرض وكل الزرع عليكى ملايكة

يا عيون الورد

بيقولوا إن أنا شبهك جدا

بيقولوا إن احنا بنشبه بعض