الست.. أمى

مسحراتى ولسة قادر

م الريف أحوّد على البنادر

أنده خديجة .. وانده تُماضر

ستات بلدنا هدى وسكينة

وحتى ربة البيت أمينة

والحضن أكبر من السفينة

يعدوا بينا من بحر هادر

ستات بلدنا من عهد سيزا

وطيارتنا كابتن عزيزة

وكل واحدة بألف ميزة

شَقت طريقها بصبر نادر

علشان تعدّى من بحر هادر

مسحراتى باعشق بناتى

والست أمى .. حياة .. حياتى

عايشة فى خُطايا و ف أغنياتى

ولا كنت اخطى

إن لم تُبادر

وتعدّى بينا من بحر هادر

الست غاية

الست آية

هى اللى حطت عِلم الرباية

وطن بينده تقوله: حاضر

حسد بيحضر تقوله: غادر

وتعدّى بينا من بحر هادر