مسلم.. مسيحى

مسحراتى

مسلم .. مسيحى

باقول يادنيا ح تستريحى

لو تقرى إيه 

اللى جه ف صحيحى

تلقى التراحم بين النفوس

رمضان بلدنا

فانوس بمادنة

وعندى صاحب اسمه 

فانوس

جارى وشقيقى

إنسان حقيقى

زاح عن طريقى

حِمل الكابوس

ودينى قال لى

ماهوش تخلى

إنك تخلى الجميع يصلى

لا تقول دا بوذى

أو م المجوس

خليك ف دينك

الله يعينك

على الفتاوى .. وعلى اللصوص

مش كل عِمة

على راس أئمة

ولا أى ذمة تدى الدروس

مسحراتى

أحب مريم

واحب حنا

وعم بطرس

صاحبى ف جنة

ربك خالقها

ويبل ريقها

بنيل نجاشى

ف الأرض ماشى

مسحراتى