متجمعين عند النبى
جمال بخيت
متجمعين عند النبى
ترتاح .. وأنسى متاعبى
متجمعين ستر وغطا
المحتاجين رب العطا
كل الأمور متبسطة
والطيبين .. والأطيبِ
متجمعين عند النبى
......…
كل المدن منورة
كل القلوب مُطهرة
م الفجر لصلاة العِشا
الحب آية مدهشة
فاطمة ورقية وعائشة
قومى بأهلك رحّبى
متجمعين عند النبى
...…
هاجر .. من الشط الجميل
جايبة لنا زمزم .. واسماعيل
آدم وهو ف وحدته
جبريل وكل ملايكته
والكهف حاضن صحبته
مع سيدنا نوح فى مركبى
متجمعين عند النبى
....…
الهدهد اللى راح وغاب
نفرح بسيرته ف الكتاب
دعوة نبى فى بطن حوت
والمعجزة ف العنكبوت
ورباطُ خيلٍ .. لا تموت
نملٌ .. يقولُ لصاحبى
متجمعين عند النبى
.…
الهاشمى .. والأعجمى
مع ابن رشد .. مُعلمى
والسامعين تلاوتى
ابنى وبنتى .. وزوجتى
وأبى وأمى وإخوتى
ومعارفى وأقاربى
متجمعين عند النبى
......…
نور الجهات المؤمنة
بالرحمة .. وبنور ربنا
الشمس قاعدة ف ضلها
والأرض طبعًا بنتها
والسِدرة عند المنتهى
ومنازلى.. وكواكبى
متجمعين عند النبى
......…
متجمعين الدمعتين
ويّا الرضا فى كل عين
والمجروحين عايزين دواء
والمظلومين ليهم رجاء
وأى ذنب عملته .. جاء
يدعو بدمع التائبِ
متجمعين عند النبى