مربعاتى الصعيدية

سود الليالى يا ناس.. بالمُر ظالمنى

وجنايتى إيه يا بشر.. والله ما عارفها

الحب ضاع من زمن.. والصبر زال منى

والأرض ضاقت عليّا.. مداينها مع ريفها

• • •

دنيا.. راحتها.. تعب.. وياما شقتنى

خلتنى ابات ف الخلا.. لو  ع اشتغل بانى

طلبت أنول ودها.. سكينها شقتنى

إن مت.. لا تنهزم.. وإن عشت غالبانى

• • •

هاين عليّا الموت.. والعقل.. حار.. منى

ياريتنى تحت التراب.. ميت بلا ديّة

اللى طلبته قليل.. وسنينى حارمنّى

والغربة أقسى كتير.. وأنا ف بلاديّا

• • •

دقت طبول ع الراس.. دق الحزين ع الطّار

طعم الخيانة عشاى.. طعم الأسى.. فطارى

ولا حد عنده الدوا.. لا طبيب ولا عطّار

وايديا متكتفة.. وضاع.. للأسف.. تارى

• • •

أبويا رَوّح ياناس.. وحنانه راح منى

كان الأمان والسند والنظرة تكفينى

واخواتى ياهلترى.. ح يكونوا راحمنى

ولاّ القساوة ف قلوبهم ع الوش تكفينى