ميـــلى

ميلى عليَّا وقرّبى المواعيد

واملى حياتى بالفرح والعيد

مااحبش اجرى ورا القمر مااطولوش

مااقدرش احبك من بعيد لبعيد

……

ميلى عليَّا بالنظر واللمس

ميلى عليَّا بالحواس الخمس

لو تفتحى باب الرضا ح ارتاح

وأكيد شفايفى ح تسعدك بالهمس

وأكيد ايديا ح تقطف العناقيد

مااحبش اجرى ورا القمر مااطولوش

مااقدرش احبك من بعيد لبعيد …..

ميلى بحنانك واعملى معروف

حلم اللقا جوة العيون ملهوف

طب ليه بتاخدك خطوتك لبعيد

وليه عينيكى بتستر المكشوف

ليه ياحبيبتى نأجّل التغريد

مااحبش اجرى ورا القمر مااطولوش

مااقدرش احبك من بعيد لبعيد