مفيش انتوا وإحنا.. كلنا واحد
متابعة: ياسمين خلف
فى تقليد سنوى، زار الرئيس عبدالفتاح السيسى، مقر كاتدرائية «ميلاد المسيح» بالعاصمة الجديدة؛ لتقديم التهنئة بمناسبة عيد الميلاد المجيد لقداسة البابا تواضروس الثانى، بابا الإسكندرية وبطريرك الكرازة المرقسية الذى كان فى مقدمة مستقبليه.
وعمت أجواء الفرح والبهجة بين الحاضرين الذين استقبلوا الرئيس بالهتاف له ولمصر وأطلقوا الزغاريد ابتهاجًا بالزيارة التى تؤكد المحبة وتوطد معانى المواطنة فى مصر.
وقال الرئيس خلال كلمته للحضور:
بسم الله الرحمن الرحيم، «هقول لكم كل سنة وانتو طيبين مش عاوز أعمل إزعاج لكم أكتر من كدة.. خلونى أبدأ كلامى إنى أحمد ربنا على إن احنا إن شاء الله منذ عام 2015 واحنا بنيجى نحتفل مع بعضنا بالعيد».
وتابع: «بهنى قداسة البابا بالكنيسة وأهنى كل المواطنين أهلنا المسيحيين والمصريين وكل الناس اللى فى العالم.. كل سنة وانتو طيبين وعيد سعيد علينا كلنا وربنا يحفظنا ويجعل أيامنا كلها أعياد وأفراح، اللهم آمين».
وأضاف: «كنت بقول إن احنا فى 2015 كان أول مرة أتشرف بالزيارة دى وأحتفل وأشوف المحبة اللى بينا.. وفى الفترة من 2015 للنهاردة حصل حاجات كتير، وأحداث كتير وأيام صعبة كتير، لكن كل مرة أنا بقول الكلام دا، إن احنا بنقول كل ما يكون شعب مصر، كلنا مع بعض، بنحب بعض بنخاف على بعض بنحترم بعض، بنحترم بعض، وما نسمحش، مش هقول لحد، ما نسمحش لأنفسنا أبدًا إن احنا علاقتنا كشعب مصر بلا أى تمييز تفضل علاقة طيبة ونحافظ عليها ونطورها ونعززها وهو دا الرصيد اللى لازم نخلى بالنا منه ونحافظ عليه ومانديش فرصة لحد أبدًا يتدخل بينا.. ما فيش بينا، مافيش انتو واحنا، فى إحنا، إحنا كلنا واحد».
وأردف: كل مرة بقول الكلمة دى، بقول لكم قداسة البابا له تقدير خاص واحترام كبير لشخصه العظيم ولكم كلكم وربنا يحفظكم ويحفظ بلدنا.
وواصل: «مش عاوز آخد وقت قداسة البابا، عام سعيد عليكم وعلينا كلنا وعلى الدنيا كلها ونقول يا رب إن 2026 يبقى عام بفضل الله أفضل علينا وعلى كل الدنيا».
وأضاف الرئيس قائلًا: «بقول للمصريين إوعوا تقلقوا أبدًا، بس بشرط، خليكم دايمًا مع بعض، واوعى حد يحاول أبدًا يخلينا نختلف أو حتى نؤذى نفسنا وبلدنا، دى وصيتى ليكم، لينا كلنا.. متابعًا: أى مشكلة بفضل الله سبحانه وتعالى، بتتحل، بس تفضل مصر بخير وسلام وشعبها بخير وسلام».
واختتم الرئيس كلمته بالقول: «مرة تانية مش عاوز أطول عليكم، كل عام وأنتم بخير وسلام وسعادة وقداسة البابا بخير وسلام وسعادة، واحنا بنبقى فرحانين أوى وإحنا موجودين معاكم، وربنا يفرحكم دايمًا ويفرح مصر والدنيا كلها، اللهم آمين.. كل سنة وانتو طيبين».