الشعب الفرفوش
جمـال بخيـت
الشعب الفرفوش
متخربش خربوش
بينكّت.. و يدمّع
ويحلق ويحوش
يحلف لك بالذمة
ويلبسك العِمة
تلبس له البرنيطة
يلبس لك طربوش
الشعب الفرفوش
......
الشعب الدراويشي
يتأخر ما يجيشي
ويقولك ملاطيشك
ما تكفيش ألاضيشي
متنغنغ أو مُفلس
يصرف ما يهموش
الشعب الفرفوش
....
الشعب الشغال
يزرب لك ف عيال
ويتنّح ويأجز
يوم عيد العمال
عنده كنوز الدنيا
ولكنه ما حيلتوش
الشعب الفرفوش
.....
الشعب الألابانضة
يتعبنى وانا بانده
ويسيبنى فى العتمة
ولا شمعة ولا لنضة
عين العقل بتاعته
شغالة على فاشوش
الشعب الفرفوش
...
ولا تعرف ألاعيبه
ولا صَحُه من عيبه
وبييجى على عشاقه
يجعلهم متاعيبه
متعلم .. ومعلم
بس انا ما فهمتوش
الشعب الفرفوش
....
بيصلى وبيصوم
وبيدى المحروم
ويلوم الحبّيبة
بكلام مش مفهوم
وان شاف أيها موزّة
يدلدق ويبوش
الشعب الفرفوش
....
الشعب المتنور
ح تضايقه ح تتعور
أحيانا يصفالك
أحيانًا يتهور
بيدور ع الحكمة
والعالم ما فيهوش
الشعب الفرفوش