البدر النوبى

البدر النوبى محبوبى

من سُمرة نيلى وجنوبى

أعشقه وأفتش ف جيوبى

ما الاقيش غير قلبى ودقاته

…..

أهدى له القلب وادقدق له

على باب الحب وازقزق له

أتمعشق فى جماله وعقله

سهر العشاق يمحى ذنوبى

……

بيته المتلون .. متلون

من ورد الحب .. ومتكون

من غربة .. والمولى يهون

مشوار الصبر الأيوبى

…..

راحل ف الغربة وقال راجع

إرحلى عن ليلى يا مواجع

ولا يوم عن حبه ح اتراجع

ح ابعت له عيونى ف مكتوبى

….

البدر النوبى اللى بحبه

أجمل أيامى كانت جنبه

ليه ينسى ف البعد حبايبه

مع إنه هوايا ومحسوبى

....

أنا شايله فى قلبى وف الننى

وعيونه الحلوة تجننى

مش ح اقبل يوم يبعد عنى

ويسيب الحزن على دروبى

....

إزاى يا حبيبى ما تفهمشى

أشواقى ف عيونى ورمشى

أتعذب وانت ما ترحمشى

وتقول لى اقبلنى على عيوبى