بحكم السن

ضلوعى تئن

وعقلى يسافر زى الجن

بحكم السن

عيونى طشاش

وعمرى ما جاش

وقلبى يحب يحس يحن

بحكم السن

أخش أنام

واسيب أجراس الدنيا ترن

لكنى بافوز

بحلم عجوز

يقول لي: يجوز

وأقول له يكنّ

يا عم اتلم

اتلم يا عم

ما كبرت خلاص

وصبحت مُسن

يرد عليا يقول:

كداب

وشَعرك شاب

لكن لسه بتعشق وتفن

راجل محظوظ

سرك محفوظ

ومشاعرك لا بتهدا ولا توّن

وبترقص رقص

يزيح النقص

وتشوف الحلوة تدوب وتجن

بتقول ما اقدرش أشيل الهم

وساعة الحضن

تشيل بالطن