اسمها مصر

جوه خلايا دماغي هرم

اتحداك تعرف أسراره

جوه چينات القلب كرم

اتحداك تعرف مقداره

وحياة رع إله الشمس

أنا مش أمس

كنت وح ابقى فجر ضمير

سر بيلمس روحك لمس

أول رايه رفعها النصر

اسمها مصر

…….

خط الطول بيقول للعرض

كله يسابق .. مصر تفوز

أغلى خريطة فوق الأرض

تملا دروب الدنيا كنوز

مصريين ف كتاب الكون

قالوا النور من غيرنا يموت

زرعوا سماء الدنيا فنون

مينا وخوفو وحتشبسوت

أول رايه رفعها النصر

اسمها مصر

……

ابني الكرنك

وازرع سلم

ناضل حارب لو ظلموك

احنا شروقنا .. شروق العلم

أما غروبنا ف وادى ملوك

قولنا أمان وإيمان ويمين

بين المؤمن والمأمون

كل العالم قالوا آمين

لما نطقنا باسم آمون

أول رايه رفعها النصر

اسمها مصر