مين آه.. ومين لأ!

خدى اللى واثق فى نفسه وفيكى

ولا تخديش الموتور اللى قاعدلك على الواحدة ومن كأس الشك ساقيكى

خدى اللى الرجولة عنده كلمة وموقف وشرف 

ولا تاخديش المدعى اللى مالوش عهد ولا وعد وعيشته قرف

متخديش اللى يفاصل معاكى فى المهر والشبكة 

خدى اللى يفرح ويفرحك بزفة بلدى وإسكندرانى ودبكة

متخديش الناقص اللى يتمنظر عليكى قدام الضيوف 

لو طنشتى وعديتى ياما بكرة هنشوف

خدى اللى يعملك فى كل مناسبة مفاجأة 

ولا تاخديش اللى وقت اللزوم يستهبل ويختفى فجأة

خدى اللى أبوه بيحترم أمه ويقدرها 

ولاتاخديش اللى بيهينها ويكدرها

خدى اللى فى كل حاجة إيده بإيدك 

ولا تاخديش البرطة اللى لما تناديله يكسل يجيلك

خدى اللى يفهمك ويدلعك ويهننك

ولا تاخديش اللى بغباؤه وتقل دمه يجننك

خدى المحترم اللى يتباهى بيكى قدام الناس 

ولا تاخديش اللى يقل منك وعاوزك مداس

خدى الكريم اللى يشتغل علشان يعيش ويصرف ويسعدك 

ولا تاخديش البخيل اللى عايش علشان يشتغل ويكنز ويحرمك

خدى اللى راضى بيكى وشاريكى بعيوبك 

ولا تاخديش اللى يستغلك علشان يسحب اللى فى جيوبك

خدى اللى يكبرك وسط أهله ويديكى وضعك 

ولا تاخديش العرة اللى على طول مصغرك وكاسفك

خدى اللى عايش معاكى هادى ونادى من غير إمارة 

ولا تاخديش اللى طول النهار يجعر وعامل غارة

 

خدى اللى لما تحتاجيه تلاقيه على رنة 

ولا تاخديش اللى يطنش ويكبر وعلى رجليه نقش الحنة

متاخديش اللى محدش قال كلمة عدلة فى حقه 

لو حبه ربه كان حبب فيه خلقه

خدى البيه اللى يحفظ مركزه وعامل لنفسه فى البيت هالة 

ولا تاخديش الخفيف اللى مقضيها هبل وهزار مع الشغالة

ماتاخديش اللى كل ما يغلط يعللى صوته ويأفور 

خدى الحقانى اللى لما يغلط يعتذر من غير ما يفكر

متاخديش اللى يستخف دمه ويستعرض قدام صاحباتك 

بكرة واحدة فيهم تاخده وتخرب عليكى حياتك

 

خدى اللى أصحابه رجالة وجدعان 

ولا تاخديش اللى غاوى قعدة النسوان

خدى المخلص اللى بيته كل همه 

ولا تاخديش قليل الرباية اللى الخيانة بتجرى فى دمه

خدى اللى عتبته خضرا وقدمه سعد 

ولا تاخديش المنحوس اللى كل خطوة طريقه ينسد