ولسه النور

ولسه النور على السلم بيستناك

ولسه بقف استنى خطاك ع الباب

ف ليل الغربة بترجاك

متتأخرشى وتجيلى

عشان عاملالك الأكل اللى بتحبه

متتأخرشى وتجيلى

عشان نقعد أنا وانت

أقولك شعر ونحكِّى

ف أول كلمة كاتباها عشان خاطرك

فتسمع مرة وتقولى كمان تانى 

عشان بتشوفنى ف مرايتك

أنا تانى 

بيصرخ أوله جواك

أنا محبوس بلا مخرج

بلا حرية أو إفراج

وتضحك تضحك القمره

ويكسى الكون ربيع أخضر

كإن عيونك السمرة

غنا بيسكِر

وحضنك لما يحوينى

شموس تقدر

تخبى العتمة ف جرابها

وغيب يابا وهستناك

أمانة عليك م تتأخر

وخلى اليتم يتأخر

وأقولك حاجة م الآخر

مفيش بعدك قصايد شعر

برغم إن القدر غلَّاب

وجاب ويانا م الآخر