إيمان عز الدين
عقلك فى راسك
مش مهم إنك تخسر حد مش بيقدر ظروفك
ولا مهم إنك تبعد عن حد مش بيعمل لزعلك حساب
واوعى تكمل مع حد ملهوش كلمة ولا عهد ولا وعد
ولا تحترم حد هو نفسه مش بيحترم نفسه ولا تسيب حد يتلاعب بأحلامك علشان تفضل معاه
ولا تسمح لحد وعوده أكبر من إمكانياته يخذلك كل مرة
بيعه واشترى نفسك.. خسارته مكسب
حياة يحكمها عقلك، وقلبك، وشغفك، وضميرك
أحسن من حياة يحكمها كلام الناس.
النملة لو فرشتلها الأرض سكر وهى فى بيات شتوى عمرها ما هتقرب منه إلا لما الشتا ينتهى والصيف يهل … كل شىء بأوان.
عندما يعتقد أحدهم أنك لن تستطيع العيش بدونه، فيبدأ فى ابتزازك عاطفيًا، وإرهاقك نفسيًا، واستغلالك ماديًا، واستهلاكك جسديًا، واستنزافك فكريًا، واستهبالك يوميًا، واستعباطك حرفيًا … اطلع اجرى.
الست لما تعيش حياة قاسية مليانة تجارب صعبة وتحديات مؤلمة مع الوقت بتتحول إلى كائن شرس جدًا، فاحذرها … تهديد.
فارق كبير قوى بين واحد معجب بواحدة، وواحد بيحب واحدة خلينى أديلكم مثال واحد شاف زهرة حلوة ومفتحة شكلها ولونها ياخذ العقل ويخطف القلب وريحتها حلوة بيبقى قدامه إذن حاجة من اثنين
إما إنه يراعيها ويرويها وتفضل محتفظة بكل جمالها وتكبر وتثمر ويستمتع بها كل لحظة أو يبقى البعيد غبى أو متخلف وأنانى وسطحى ومعندهوش تمييز وأعمى قلب ونظر وهووووب يقوم قاطفها وواخدها علشان يمتلكها وطبعا هتدبل مع الأيام، لأن ببساطة اتقصف عمرها على إيده ومستحيل ترجع للحياة تانى مهما عمل خدى اللى يحبك مش اللى انتى عجباه
أبشع جريمة ممكن تعملها فى حق نفسك … جلد الذات، إنك تفضل تلومها على تصرفات غلط عملتها فى يوم من الأيام وتسأل، يا ترى الناس هتقول عليا إيه وشايفانى إزاى وأنا لازم أثبت لهم العكس
ليييييييه كل ده
لازم تفهم إن الناس اللى حواليك مش ملايكة.
وإن معظمهم خاربينها بس انت متعرفش.
الفرق الوحيد إن فيه ناس بتعرف تعيش حالة ازدواجية مرعبة.
وناس تانية واضحة علشان كده مكشوفة،
والفرق هو أن الصنف الاول ده مخيف لكن التانى غشيم.
علشان كده لازم تاخد الجانب الإيجابى من الموضوع وتتعلم من أخطائك، مش هى اللى تعلم عليك.
إما تحب إنسان قادر يحتويك ويملا قلبك وعينك وعقلك، إما تعيش لوحدك.
الست الشاطرة عاملة زى البطاطس المحمرة، مقرمشة من برة وطرية من جوه.
مش عيب أن الدنيا تعلمك، العيب أنها تعلم عليك.
اللى عايش مع أبوه وأمه
اللى عايشه مع زوج بيراعيها ويحبها.
اللى عايش مع زوجة بتراعيه وتحبه
اللى عنده عيال.
اللى قادر يصوم ويصلى ويتصدق.
أنا قلت كل حاجة لوحدها لأن حاجة واحدة بس من دول لازم تفضل تحمد ربنا عليها وتشكر فضله ونعمته عليك، فما بالك لو ربنا كرمك بأكثر من نعمة.
أنا بأقول الكلام ده لأن فيه ناس معندهاش ولا حاجة من دول، ومع ذلك بتحمد ربنا أكتر من ناس كتير وراضية.
اللى يزرع فى أرض بور مش هيجنى غير الوهم.
السعادة المؤجلة لعنة
هتفضل تأجل لحد ما تنسى تفرح وتعيش وتاخدك دوامة الحياة.
وساعتها محدش هيسلفك من عمره
السعادة قرار بييجى من جوة لبرة مش العكس.
محدش يستاهل فرصة تانية
الفرصة دى تديها لنفسك مع حد تانى
احنا مش ناقصين وجع قلب وفرهدة … العمر مش بعزقة.
عندما يسيطر عليك الألم ليتمكن منك، فيعتصر روحك، وتجد أن المهرب
الوحيد الآمن هو الاتجاه إلى داخل النفس وأعماق الذات.
فأنت لست بخير
عندما يحتل الحزن ثنايا قلبك ليستقر فى صدرك فتجد أنفاسك الحارة الملتهبة تخرج باهات تكسر صمتك
فأنت لست بخير.
عندما تتلفت حولك فلا تجد من يقدر ضعفك ووهنك وينمحى الشعور بالراحة والأمان والسكينة
فأنت لست بخير.
عندما تنعدم الرؤية والثقة فى أن القادم أفضل لتكتشف أن اليأس تغلغل إلى مشاعرك فى غفلة منك
فأنت لست بخير.
عندما تغلى الدموع بداخلك وتصل إلى مقلتيك فتنهمر وتسيل على وجنتيك لتحرقهما قهرا فأنت لست بخير.
عندما تواجه هجمات الليل وتعانى قسوة الظلام وحيدا ولا يحيط بك إلا جدران الغرفة الباردة فأنت لست بخير.
عندما تجد أن ذراعيك تحتضنان بعضهما لتشعر بالدفء وتنام ويداك ممسكتان ببعضهما لتطمئن
فأنت لست بخير.