أخلاق رياضية

تأكيدا لاهتمام  الدولة بالرياضة  والرياضيين، استقبل الرئيس عبدالفتاح السيسى اللاعبين والمدربين، الحاصلين على ميداليات ذهبية ببطولة الألعاب الإفريقية، تكريمًا لهم.

ورحب الرئيس فى كلمة له، باللاعبين والمدربين، الحاصلين على ميداليات ذهبية ببطولة الألعاب الإفريقية، معربًا عن سعادته بلقائهم، قائلًا: «ألف مبروك وبهنيكم على اللى حققتوه» مضيفا: «أنتم فرحتوا كل الناس، وكل المصريين اللى شافوا النتايج اللى أنتم حققتوها، واللى ممكن كمان ربنا يوفقنا ونحققها فى باريس بيكم برضو إن شاء الله وبزمايلكم اللى موجودين هنا أو اللى موجودين فى المعسكرات الرياضية برة، ربنا يوفقهم». 

 

 

ووجه الرئيس السيسى الشكر للأبطال باسمه وباسم كل المصريين، كما وجه الشكر لكل المشرفين والقائمين من أجهزة إدارية وفنية، مؤكدًا أن هذا الجهد كبير جدًا، وأن الرياضة تعكس مدى تحضر الدول والشعوب، وكلما كان هناك نجاح وتفوق وميداليات أكثر، فإن النتيجة تعكس قدرة الدولة على المنافسة، وكلما حققت ميداليات أكثر كلما كانت قدرة الدولة عالية.

وأكمل أن مصر لديها عدد سكان كبير، وبالتالى فإن الفرصة سانحة لدينا لكى يكون لدينا لاعبون متميزون دوليون، موضحًا «لأن عندنا حجم شباب كبير لو خد فرصته.. والكلام ده لينا كلنا ولكل مهتم بالرياضة لو الشباب خد فرصته ويبقى عنده فرصة فى لعبة معينة مش شرط كرة القدم فقط لكن فى أى من الألعاب».

وأضاف: مش عايز أطول عليكم، أنا سعيد إن انتوا موجودين معانا النهاردة، وسعيد باللى حققتوه فى أفريقيا، وهبقى سعيد أكتر أو هنبقى كلنا سعداء أكتر باللى ممكن تحققوه بعد كده لأن طبعا المنافسة على مستوى العالم أكبر كتير من أفريقيا، وطبعا دول متقدمة جدًا فى مجال الرياضة بتبقى موجودة، وبالتالى لو النتائج كويسة دا معناه إن إحنا ماشيين فى الطريق السليم.

وشدد الرئيس السيسى على أنه رغم حرصنا الحصول على ميداليات وبطولات لكن دائمًا يبقى الأسلوب وتقديم أنفسنا بشكل يليق بمصر، موضحًا: «يعنى لو أنا النهاردة لاعب أو لاعبة موجودة خارج الدولة أو حتى داخل الدولة ولازم أكون حريص جدًا إن أنا فى ممارساتى وسلوكياتى كلها تعكس حجم كبير من التحضر والقيم الرفيعة». 

 

 

وتابع: صدقونى بغض النظر عن النتائج، لكن جزء مهم جدا من فضلكم مهم أوى أن إحنا كلنا نبقى حريصين عليه، اللى هو المنافسة الشريفة وأخلاق الرياضة المحترمة، خلوا بالكم من النقطة دى أوى، لأن ده بيبقى محل تقييم من الناس اللى بتشوفنا، وجزء كبير من الموضوع إن الناس تشوف الناس دى سلوكياتها إيه؟ وأخلاقياتها إيه؟، مش بس نتائج اللعبة.

واختتم الرئيس كلمته قائلا: مرة تانية بقولكم ألف مبروك وأهلا وسهلًا، سعيد باللى انتوا حققتوه، ويارب يوفقكم، ومش هنسى أقولكم إن انتوا وجهوا بالنيابة عنى الشكر لأسركم اللى ساهمت مساهمة كبيرة جدا فاللى إنتوا وصلتوله شكرا جزيلًا.