صباحات
أكون إنسان
الأربعاء 24 يوليو 2024
كتب
شعر: مى منصور
مش قادر أبوح ولا قادر أسكت
حتكلم من جوايا يمكن قول الصمت يرقد
هجى الفكر وصهد الكلمة ف جوف الراس
وأنا الونّاس
أنا القنديل ف ليل دربك وسهره بناى
وأنا الضهر اللى محنيلك
عشان تطلع تشوف الجاى
وأنا فكره وربيع طارح
وأنا الجسر اللى رابط بكره بامبارح
وعديته وهديته
وماشى عادى ورميته
ف هامش فكرة مهجورة بلا عنوان
ويكفينى تكون كائن
وأكون إنسان