ما قطفش منها وردة

أنا أعرف واحد

نام ..

وبيتفرّج ع الدّنيا

دقايق

وكأنها فيلم ف سيما

والأبطال طيّبين

من غير عياط

ولا خوف

ولا دم

أنا أعرف واحد

عاش ..

كل حياته ف حلم ..

ما قطفش منها وردة

وامّا كان يطلب مساعدة

الصّوت يتحاش ,

والدنيا تغيب

وتضلّم

وكأنك شدّيت ستارة 

على شيش مفتوح

أنا اعرف واحد

مات ..

وما سبش غير ..

دق السّاعات ع الحيط ,

صوت الأغاني

وجرنان قديم

حاجات لها طعم الحياة

ولسّه فيها الرّوح 

بنت الحلال الوحيدة

البحر ..

أول دموع الأرض

بعد اللقا

الحزن ..

أول سلّمة طلعت عليها الليالي

تطفي اللمض

الخوف ..

أول صديق خان العِشرة

لما حس بأمان

الشط ..

أول صفحة بيضة

شخبط عليها الزمن

وقت الوداع

الحقيقة ..

بنت الحلال الوحيدة ..

ف دنيتك الفانية

وأنت بكل غباوة

سايبها

   ورايح ..

     لواحدة تانية

بتفُكّها وتعَقّدها

الصبح‏:‏

إحساس طازة

بطعم حاجات بتعود‏ ..‏

زي ملامحك

اللي سبتها إمبارح ع البوفيه

وجريت قوام علشان تنام

وتحلم

الضُّهر‏:‏

وبدون أسف

حلمك ..

هـ تحطه ف ظرف جواب

وتقفله

وهـ تكتب عليه ..

( مع خالص تحياتى )

المغرب‏:‏

الناس خيوط بتعَقّدها الحياة

وتفُكّها .. 

دخان كثيف ع القهوة

الليل‏:‏

هـ تفلّى قلبك م الهموم 

هَم أبيض‏ هَم أسود

هَم كان ف وقته شيلة

ومش باقى منّه 

زي كل هموم الناس

وتقوم ..

تسيب ملامحك ع البوفيه

وتجري قوام علشان تنام

وتحلم.