الصورة والتفاصيل

والدنيا من جوه

الحلم والأسرار

كات باختصار حوا

فكرت يومها أهرب

كانتلى بالقوة

• • •

كنت القدر

كانت صدف

كانت مطر 

رمش وحدف

سهم ورشق

قلبى عشق

• • •

آخر جنان

قسوة وحنان

العقل دق

القلب شق

فى روحى بيت

وأنا بابى رق

• • •

إيدى فى إيديها ضحكنا ع الدنيا

إيدى فى إيديها الدنيا بالألوان

إيدى فى إيديها خوفى كله أمان

وسابتنى فجأة ف توهت فى العنوان

• • •

بحكى عليها الصدفة والأيام

بحكى عليها حلم م الأحلام

بحكى عليها الكل مش واحد

كات كلهم فى شخصها الواحد

• • •

أنا كنت أجبن حاجة فى الصورة

شافت ساعتها الكادر ميساعناش

واللقطة فى إيديا ف حسبتها ببلاش

راحت ونبض القلب قالى أنه جى ومجاش

• • •

هى الحاجات والمحتاجات هى

تحضر فيحضر كل شيء فيا

تروح وتيجى وتيجى بس تروح

وتسيب فى قلبى عشقها المطروح

• • •

الصورة والتفاصيل

والدنيا من جوه

الحلم والأسرار

كات باختصار حوا

فكرت يومها أهرب

كانتلى بالقوة