إيمان عز الدين
عقلك فى راسك
ـ الستات ساعات بتضايق وتتعصب من غير سبب وده بيبقى تأثير الهرمونات عليها سواء الشهرية أو أثناء الحمل أو بعد الولادة أو أثناء الرضاعة أو فى سن انقطاع الطمث.. أقولك أنت المفروض تستحملها وتعذرها على طول وهى شوية وهتهدى…
حضن جامد هيخلص الموضوع.
ـ ابن الأصول يتعاتب ويتلام، والخسيس خسارة فيه السلام والكلام
ـ لو قدامك شخص مجروح بلاش تقوله "معلش" ولا أنت مكبر الموضوع ولا أنت غلطان، بلاش تدفعه لجلد الذات...
لأن هو كدا كدا بيبقى مغلط نفسه ومش مستحمل.
ـ الراجل لو عاوز إنك متعرفيش حاجة هو كفاءة يعمل كده...
متحاوليش تسألى وتدورى وراه…
علشان مش هتعرفى غير اللى هو عايزك تعرفيه وبس.
ـ أول جريمة وقعت فى السماء كانت بسبب الغيرة عندما غار إبليس من بنى آدم…
أول جريمة وقعت على الأرض كانت أيضا بسبب الغيرة عندما غار قابيل من هابيل فقتله…
الغيرة هى منبع الغل والحقد والحسد والعدو الأول للإنسانية منذ بدء الخليقة فاحذروها.
ـ الحب هو المعركة الوحيدة على وجه الأرض التى تنتهى إما بمكسب أو خسارة الطرفين!
ـ قمة الخداع والذكاء الأنثوى أن أجعلك تنطلق بكل قوتك وكامل إرادتك إلى ما دفعتك أنا نحوه، تعتقد أنك بلغت الغاية وحققت الهدف وتظن فى النهاية أنك قد انتصرت… فتحتفل أنت وأضحك أنا.
ـ شكل الست مهمتها وشكل الراجل كمان مهمتها.
ـ فيه فرق بين واحد يديكى 10 جنيه بطيب خاطر وهو محيلتهوش غيرها، وواحد يرميلك 100 جنيه وهو معاه ألوفات.
ـ فيه فرق بين واحد يجيبلك وردة أو شوكولاته أو حتى قصقوصة ورق عليها كلمتين حلوين ومعندوش فى الدنيا أغلى منك…
وواحد يجيب لك خاتم ألماظ بس عنده منك كثير.
ـ يا ست البنات…
لما تيجى تتجوزى اختارى اللى ترتضى لنفسك معاملة أبوه لأمه…
علشان دى ثقافة البيت ومش هتتغير…
ويا ريت مسمعش كلمة أنا هغيره بعد الجواز…
محدش بيتغير… كان غيرك أشطر.
ـ الإنسان البار بأمه…
هو نفسه الحنون على أخته…
هو نفسه الودود لزوجته…
هو نفسه الرحيم بابنته…
الإنسان لا يتجزأ.
ـ حكمة ربنا أن الزواج مودة ورحمة، علشان لو واحدة فيهم قلت التانية ترجعها.
ـ الصداقة قبل الزواج معناها أن فيه تقارب فكرى ولغة حوار وتواصل بين شخصين ودى بتقرب المسافات... عكس الزواج عن حب ورغبة بس…
المشاعر فيه ممكن تنطفى بعد فترة قصيرة.
ـ لما تكرهوا بعض وتستحيل العشرة بينكم انفصلوا فورا وبلاش تدمروا كل شىء وحاولوا تحافظوا على الحد الأدنى من الاحترام اللى يخليكم تقدروا تبصوا فى وش بعض علشان خاطر العيال اللى بيدفعوا تمن سوء اختياركم.
ـ أطفال يعيشوا ما بين أب وأم منفصلين بس بيحترموا بعض وبيتعاملوا مع بعض بما يرضى الله...
أحسن ما يعيشوا فى بيت واحد مع أب وأم بيكرهوا بعض وبيستخدموهم دروع بشرية.
ـ فيه ستات تقولك طلقنى لمجرد إنها عاوزة تسمع منك…
مقدرش أطلقك، مستحيل أعيش من غيرك، أنا بحبك…
يعنى عاوزاه يهتم بها.