اكتبينى

 (1) إحساس براءة

اكتبينى..

لو ليا خاطر

أو معزّة جوه قلبك

اكتبينى..

اكتبى..

أيام طفولتى

عود منبت

بيمد جدره لتحت

باصص للسما

بيقول

يارب

فارد دراعه ع المدى

حضن طفل

رغم أنه كان صُغير

إلا إنه كان يساع الكون بحاله

كان فراشة

كان يمامة

الأرض

جنة

والبشر

إحساس براءة. 

(2) عنوان حياته

اكتبينى..

حبه

حبه

الدنيا تكشف وشها

تتعرى 

أيوه

إحساس مُغاير

الطفل يكبر

والصبى يبقى ابن حلم

والحلم يكبر

يبقى مالك روحه..عمره

راسم لنفسه

ميت طريق

والورد مفروش ع النواصى

من غير بداية

أو دليل

والصدمة تبقى عنوان حياته.

(3) أكون.. ما كُنشى..

اكتبينى..

ليه يعنى لما أتمنى

أكون..

ما كُنش

رغم إنى عارف 

إنْ أنا مُش زى حد

مختلف

وليه أنا بالذات..…

مُش حد غيرى

مكتوب

قدر

طريق مُغاير

المعادلة أتغيرت

الطفل مات

والصبى جوايا أيوه

شعور مجازى. 

(4) يمكن تعيش..

اكتبينى..

حلم..

حمل حمولتك فوق كتافك يا وله

مين غيرك إنت راح يشيل؟

كفك

سند

نقطة عرق

رغم الظروف

حاول وقاوم

يمكن تعيش.

(5) مشوار طويل..

اكتبينى..

ميراث..

لما حلمك

هّو..

هّو..

حلم أبوك

تتمنى مره تِفرّحُه

مشواره

كان مشوار طويل

حبة تعب

إنسان شريف

اليوم بيومه

والنتيجة

شهادة تخرج

متعلقة

مترَّبة

مالهاش تمن

غير عمر ضايع.